Олий Мажлис Сенатининг 29-сентябр куни ўтказилган ялпи мажлисида Uzbekistan Airways’га қарашли авиакассалардан чипталар олишдаги муаммо танқид қилинди.
Ялпи мажлис кун тартибидаги масалалар муҳокамасидан аввал сенаторлар ҳудудларда олиб борган ўрганишлари давомида аниқланган мавжуд камчиликлар, фуқароларнинг кўплаб эътирозларига сабаб бўлаётган муаммоларни кўтарди.
Хусусан, Мудофаа ва хавфсизлик масалалари қўмитаси раиси Қутбиддин Бурхонов қўмитага келиб тушган мурожаат асосида Uzbekistan Airways АЖга қарашли авиакассалар фаолияти билан боғлиқ айрим муаммолар сабаблари дастлабки тарзда ўрганилганини билдириб, авиачипта сотишда эскирган бюрократик усуллар ҳамон сақланиб қолаётганини айтди.
Қутбиддин Бурхоновнинг маълум қилишича, “Ўзбекистон ҳаво йўллари” миллий авиакомпаниясининг 2015 йил 25-октябрдаги 75-сон буйруғи билан тасдиқланган йўриқноманинг эскиргани, ундаги тегишли нормаларнинг такомиллаштирилмагани фуқаролар учун ўринсиз, мантиқсиз тўсиқларни юзага келтирмоқда. Йўриқнома тегишли бандига мувофиқ, фуқаролар Uzbekistan Airways’га қарашли кассалардан ўз яқинлари учун авиачипта сотиб олмоқчи бўлса, улардан фуқаролик паспортининг асл нусхаси талаб қилинмоқда. Паспортнинг асл нусхасини тақдим этмаган фуқароларга эса авиачипта сотилмаяпти.
Оқибатда бу ҳолат, айниқса, яқинлари бошқа вилоятларда яшаётганлар учун қатор қийинчиликларни юзага келтирмоқда ва шу боис, йўловчиларнинг ҳақли эътирозлари кундан-кунга кўпаймоқда.
Авиакомпаниянинг uzairways.com.uz сайти орқали онлайн тарзда фуқаролик паспортининг серия рақами ва амал қилиш муддатларини кўрсатган ҳолда авиачиптани қонуний сотиб олиш имконияти эса мавжуд.
“Табиий савол туғилади: агар шундай имконият бўлса, нима учун Uzbekistan Airways’га қарашли кассалардан ўз яқинлари учун авиачипта сотиб олмоқчи бўлган шахслардан фуқаролик паспортининг асл нусхаси талаб қилинмоқда?
Нима учун юқорида қайд этилган Йўриқномага паспортнинг серия рақами ва амал қилиш муддатларини кўрсатган (паспорт нусхаси орқали) ҳолда авиачиптани сотиб олиш мумкинлиги тўғрисидаги қоида киритилмаган?”, — дейди Қутбиддин Бурхонов.
Унинг қайд этишича, авиакомпания сайти ёки мобил иловаси орқали мустақил равишда зарур шахсий маълумотларини киритиб авиачипта сотиб олган фуқаро давлат чегарасини кесиб ўтишда ДХХ Чегара қўшинлари томонидан керакли база орқали текширилади ва маълумотлар нотўғри киритилганлиги аниқланган тақдирда, давлат чегарасини кесиб ўтишига рухсат берилмайди ва масъулият фуқаронинг ўзида қолади.
“Табиийки, бундай ҳолатлар авиачипталар савдосидаги коррупцияга ҳам сабаб бўлмоқда, фуқароларга енгиллик бериш ўрнига фақат ташвиш ва қийинчилик келтирмоқда”, — дейди Мудофаа ва хавфсизлик масалалари қўмитаси раиси.
Унинг сўзларига кўра, Сенат юқорида қайд этилган муаммони ҳал этиш учун Йўриқномага тегишли ўзгартиришлар киритиш юзасидан 2021 йилнинг 19 мартида Uzbekistan Airways’га мурожаат қилинган. Сўров юзасидан берилган жавобда “ушбу муаммони бартараф этиш чоралари кўрилаётганлиги” маълум қилинган. Аммо бундан қарийб икки йил олдин аниқланган ва сўровда кўрсатилган муаммолар ҳозир ҳам ўз ечимини топмаган.
Бундан ташқари, Транспорт вазирлигига сенатор мурожаати такроран йўлланган. 2023 йилнинг 23 июнида эса Uzbekistan Airways бошқарув раиси биринчи ўринбосари имзоси билан Сенатга йўллаган жавобида ҳеч бир асоссиз бу муаммони ҳал қилиш имконсиз экани маълум қилинган.
“Наҳотки, ҳам фуқаролар эътирозига, ҳам коррупцияга сабаб бўладиган, очиқ-ойдин кўриниб турган бўшлиқни бартараф этиб бўлмаса” — дейди дейди Қутбиддин Бурхонов.
Изоҳ (0)