Oliy Majlis Senatining 29-sentyabr kuni o‘tkazilgan yalpi majlisida Uzbekistan Airways ga qarashli aviakassalardan chiptalar olishdagi muammo tanqid qilindi.
Yalpi majlis kun tartibidagi masalalar muhokamasidan avval senatorlar hududlarda olib borgan o‘rganishlari davomida aniqlangan mavjud kamchiliklar, fuqarolarning ko‘plab e’tirozlariga sabab bo‘layotgan muammolarni ko‘tardi.
Xususan, Mudofaa va xavfsizlik masalalari qo‘mitasi raisi Qutbiddin Burxonov qo‘mitaga kelib tushgan murojaat asosida Uzbekistan Airways AJga qarashli aviakassalar faoliyati bilan bog‘liq ayrim muammolar sabablari dastlabki tarzda o‘rganilganini bildirib, aviachipta sotishda eskirgan byurokratik usullar hamon saqlanib qolayotganini aytdi.
Qutbiddin Burxonovning ma’lum qilishicha, “O‘zbekiston havo yo‘llari” milliy aviakompaniyasining 2015-yil 25-oktyabrdagi 75-son buyrug‘i bilan tasdiqlangan yo‘riqnomaning eskirgani, undagi tegishli normalarning takomillashtirilmagani fuqarolar uchun o‘rinsiz, mantiqsiz to‘siqlarni yuzaga keltirmoqda. Yo‘riqnoma tegishli bandiga muvofiq, fuqarolar Uzbekistan Airways ga qarashli kassalardan o‘z yaqinlari uchun aviachipta sotib olmoqchi bo‘lsa, ulardan fuqarolik pasportining asl nusxasi talab qilinmoqda. Pasportning asl nusxasini taqdim etmagan fuqarolarga esa aviachipta sotilmayapti.
Oqibatda bu holat, ayniqsa, yaqinlari boshqa viloyatlarda yashayotganlar uchun qator qiyinchiliklarni yuzaga keltirmoqda va shu bois, yo‘lovchilarning haqli eʼtirozlari kundan-kunga ko‘paymoqda.
Aviakompaniyaning uzairways.com.uz sayti orqali onlayn tarzda fuqarolik pasportining seriya raqami va amal qilish muddatlarini ko‘rsatgan holda aviachiptani qonuniy sotib olish imkoniyati esa mavjud.
“Tabiiy savol tug‘iladi: agar shunday imkoniyat bo‘lsa, nima uchun Uzbekistan Airways ga qarashli kassalardan o‘z yaqinlari uchun aviachipta sotib olmoqchi bo‘lgan shaxslardan fuqarolik pasportining asl nusxasi talab qilinmoqda?
Nima uchun yuqorida qayd etilgan Yo‘riqnomaga pasportning seriya raqami va amal qilish muddatlarini ko‘rsatgan (pasport nusxasi orqali) holda aviachiptani sotib olish mumkinligi to‘g‘risidagi qoida kiritilmagan?”, — deydi Qutbiddin Burxonov.
Uning qayd etishicha, aviakompaniya sayti yoki mobil ilovasi orqali mustaqil ravishda zarur shaxsiy maʼlumotlarini kiritib aviachipta sotib olgan fuqaro davlat chegarasini kesib o‘tishda DXX Chegara qo‘shinlari tomonidan kerakli baza orqali tekshiriladi va maʼlumotlar noto‘g‘ri kiritilganligi aniqlangan taqdirda, davlat chegarasini kesib o‘tishiga ruxsat berilmaydi va masʼuliyat fuqaroning o‘zida qoladi.
“Tabiiyki, bunday holatlar aviachiptalar savdosidagi korrupsiyaga ham sabab bo‘lmoqda, fuqarolarga yengillik berish o‘rniga faqat tashvish va qiyinchilik keltirmoqda”, — deydi Mudofaa va xavfsizlik masalalari qo‘mitasi raisi.
Uning so‘zlariga ko‘ra, Senat yuqorida qayd etilgan muammoni hal etish uchun Yo‘riqnomaga tegishli o‘zgartirishlar kiritish yuzasidan 2021-yilning 19-martida Uzbekistan Airways ga murojaat qilingan. So‘rov yuzasidan berilgan javobda “ushbu muammoni bartaraf etish choralari ko‘rilayotganligi” maʼlum qilingan. Ammo bundan qariyb ikki yil oldin aniqlangan va so‘rovda ko‘rsatilgan muammolar hozir ham o‘z yechimini topmagan.
Bundan tashqari, Transport vazirligiga senator murojaati takroran yo‘llangan. 2023-yilning 23-iyunida esa Uzbekistan Airways boshqaruv raisi birinchi o‘rinbosari imzosi bilan Senatga yo‘llagan javobida hech bir asossiz bu muammoni hal qilish imkonsiz ekani maʼlum qilingan.
“Nahotki, ham fuqarolar eʼtiroziga, ham korrupsiyaga sabab bo‘ladigan, ochiq-oydin ko‘rinib turgan bo‘shliqni bartaraf etib bo‘lmasa” — deydi deydi Qutbiddin Burxonov.
Izoh (0)