Ўзбекистонда 65 нафар боланинг ўлимига сабабчи дея қаралаётган “Док-1 Макс” сиропи масаласида суд иши бошлангани, кўплаб судланувчилар судда тергов қилинаётгани ҳақида хабар берилганди. Суднинг 22 сентябрь куни давом этган навбатдаги мажлисида 33 минг доллар олди-бердисида воситачилик қилгани айтилган айбланувчига қамоққа олиш тарзидаги эҳтиёт чораси қўлланди. Айбланувчи суд залидан қамоққа олинди.
Судья Мусо Юсуповнинг маълумот беришича, бунга жамоатчилик ва адвокатларга номаълум бўлган мурожаатчининг ДХХ раисига шикоят қилиб, судда унинг фойдасига ҳал бўладиган кўрсатма беришга ундагани ёзилган аризаси сабаб бўлган.
Судда, шунингдек, давлат айбловчиси Равшан Ражабов ҳам судланувчига қамоққа олиш тарзидаги эҳтиёт чораси қўллашни сўради.
Суднинг аввалги мажлисларида ҳиндистонлик тадбиркор ўзига тегишли корхонага инспексион текширув тушишининг олдини олиш, шунингдек, Ўзбекистон ҳудудига “Док-1 Макс” сиропи каби яна бир талабга жавоб бермайдиган дорига рухсат олишга уринганини айтиб, агентликнинг собиқ ходимига 33 минг доллар берганини тан олганди.
Р.С.П. жиноий шериклари Ж.С. ва Б.Қ.лар билан тузилган жиноий режасини амалга ошириш мақсадида Ж.Э. билан аввалига телефон орқали боғланиб, кейинроқ у билан ЖИБ Миробод туман суди яқинида жойлашган “Б&Б” кафесида кўришган. Суҳбат давомида Р.С.П. корхонага тайинланган инспекцион текширувни бекор қилишда амалий ёрдам сўраб, бунинг учун моддий манфаат ваъда қилган. Шунда Ж.Э. унинг таклифини раҳбарларига етказиб, тез кунларда уларнинг жавобини маълум қилишини билдирган. Ж.Э. таклифни давлат маркази рўйхатдан ўтказиш бўлими бошлиғи Ш.Ш.га етказган. Масъул ушбу хизмат 45 минг доллар бўлишини айтган. Ҳиндистонлик тадбиркор уларга 33 минг доллар бера олишини билдирган. Ва айтилган пулни берган, — дейилади бу ҳақидаги тергов ҳужжатларида.
Ҳиндистонлик судланувчи Р.С.П. кейинчалик бу ҳақда айтган гапларини рад этиб, суддаги дастлабки кўрсатмасини ўзгартирганди.
Судда 15 сентябрь куни бўлиб ўтган навбатдаги мажлисида сўроқ қилинган “Дори воситалари, тиббий буюмлар ва тиббий техника экспертизаси ва стандартлаштириш давлат маркази” ДУК рўйхатдан ўтказиш бўлими бошлиғи Ш.Ш. унга берилгани айтилган 33 минг доллар пулни рад этганди.
Адвокат Даврон Аҳмадовнинг бу ҳақдаги саволига жавоб қайтарган судланувчи Ш.Ш. “Мен Ж.Э. билан инспекцион текширув бўйича, айнан Кураракс дори воситасининг қандайдир манфаати бўйича 45 минг доллар ёки 33 минг доллар ҳақида гаплашмаганман. Сабаби буни хоҳласам ҳам, у менинг ваколатимга кирмайди”, — деганди.
Изоҳ (0)