“Док-1 Макс” ишлаб чиқарувчиси Ўзбекистонга яна 4 та дори киритишга урингани маълум бўлди

Ўзбекистонда 65 нафар бола ўлимига сабабчи дея қаралаётган “Док-1 Макс” сиропи ишлаб чиқарувчиси — Ҳиндистоннинг Marion Biotech Pvt. Ltd корхонаси Ўзбекистонга яна 4 та дориларни киритишга ҳаракат қилган. Бу ҳақда навбатдаги суд мажлисида судланувчилардан бири гапириб берди. 

Судда дастлаб кўрсатмаларини айтган судланувчи — “Дори воситалари, тиббий буюмлар ва тиббий техника экспертизаси ва стандартлаштириш давлат маркази” ДУКнинг “Дори воситалари сифатини назорат қилиш ва стандартлаш” лабораторияси мудири Г.Б. судья Мусо Юсуповнинг “Қайси дориларда камчиликлар аниқланганди”, деган саволига жавобан шу ҳақида гапирди. 

Судланувчининг тушунтиришича, Marion Biotech Pvt. Ltd корхонаси масъуллари “Док-1 Макс” сиропидан топилган этиленгликол ва диэтиленгликол каби ёт моддалари мавжуд бўлган бошқа дориларни ҳам рўйхатдан ўтказиб, Ўзбекистонда сотилишига рухсат сўраган. 

“Тарирекс” дори воситаси, кейинчалик “Кураракс” номи билан рўйхатдан ўтган. Кейин “Куюразит” таблетка дори воситаси, “Трамжойн” таблетка воситаси, “Разинокс” таблетка дори воситаси “Дашборд” номли электрон базага киритилиб, камчиликлари бартараф этилиши белгиланган, — дейди судланувчи.

Қўшимча қилинишича, мазкур дорилар Ўзбекистондаги дорихоналарда сотувга чиқишга улгурмаган. 

Ўзбекистонда 65 нафар бола ўлимига сабабчи дея қаралаётган “Док-1 Макс” иши бўйича суд мажлиси 2023 йилнинг 11 август куни Тошкент шаҳар судининг жиноят ишлари бўйича судлов ҳайъати томонидан кўрила бошланган бўлиб, суд очиқ суд мажлиси тарзида давом эттирилмоқда.

Суд мажлисларида айбланувчиларнинг адвокатлари бир неча бор ОАВлар фаолиятига эътироз билдириб, суддаги маълумотлар оммага чиқланаётганидан ёзғирган. Шунингдек, улар “Кun.uz”, “Qalampir.uz” нашрларини айбсизлик презумпсиясига амал қилмасликда айблаган бўлса, “Gazeta.uz” нашрини суд жараёнларини онлайн тарзда ёритишда айблаб, фаолиятини чеклаган. Шундан сўнг судда ушбу нашр вакиллари иштирок этмаяпти.

“Док-1 Макс” иши бўйича 8 сентябрь куни бўлиб ўтган суд мажлисида судланувчилардан бирининг адвокати, адвокат Собиров “Дарё” интернет нашрини суддаги маълумотларни оммага очиқлаб, барча кирдикорларни фош этишда айблади. Ва суд ҳайъатига илтимоснома киритиб, нашр журналистилари ҳамда судда иштирок этаётган бошқа ОАВ вакилларини суддан чиқариб юборишни сўраганди.

“Дарё” нашри мазкур маълумотлар судда сўз олган судланувчилар томонидан янграётганини эслатиб, суд мажлисида судланувчилар ва адвокатлар савол-жавобида бундан-да қизиқ маълумотлар янграётганини, аммо суд терговига халал бермаслик мақсадида барчасини очиқлашга рухсат берилмаётганини қўшимча қилади.