“Док-1 Макс” судида бир неча ОАВни айбсизлик презумпциясига амал қилмасликда айблаган адвокатлар “Дарё” нашрини ҳам суддан четлатишни сўрамоқда

Ўзбекистонда 65 нафар боланинг ўлимига сабабчи деб қаралаётган “Док-1 Макс” иши бўйича навбатдаги суд мажлисида судланувчилардан бирининг адвокати, адвокат Собиров “Дарё” интернет нашрини суддаги маълумотларни оммага очиқлаб, барча кирдикорларни фош этишда айблади. Ва суд ҳайъатига илтимоснома киритиб, нашр журналистилари ҳамда судда иштирок этаётган бошқа ОАВ вакилларини суддан чиқариб юборишни сўради. 

Адвокат Собиров “Дарё” нашрида 2023 йилнинг 6 сентябрь куни эълон қилинган “ ‘Ўлим ҳолатига олиб келишини билмаганмиз’. Судланувчи ‘Док-1 Макс’ сиропи лабораториядан ўтказилмаганини тан олди” ҳамда “ ‘Док-1 Макс’ иши: судланувчилардан бири заҳарли сироп ҳақида жамоатчиликни хабардор қилган самарқандлик шифокорларни, масъулларни судга чақиришни сўрамоқда”, сарлавҳали мақолаларга эътироз билдирган. Адвокатга кўра, нашр бу мақолалар орқали судланувчилар айтган маълумотларни оммага олиб чиқиб, суддаги барча маълумотлардан жамоатчилик хабардор бўлиб қолаётганини айтиб, сайт вакилини суддан чиқариб юборишни сўраган. 

Ҳимоячи Собировнинг илтимосномаси мавжуд 21 нафар судланувчининг адвокатлари ва судланувчилар томонидан тўлиқ қўллаб-қувватланди. Фақат давлат айбловчиси бу ҳолат бўйича ажрим чиқаришни судга ҳавола қилди. 

Суд ҳайъати мазкур илтимосномани тинглагач ўзаро маслаҳатлашиб, “Дарё” нашри вакилини огоҳлантирди. Ва суддаги маълумотларни суд иши тугамагунга қадар оммага ошкор этиш мумкин эмаслигини билдирди. Суд мажлиси ҳақида ёзганда судланувчиларнинг гапларини оммага олиб чиқиб, аниқ тафсилотларни очиқламасликни, шунчаки суд бўлиб ўтди деган умумий маълумотларни ёритиш кераклигини маслаҳат берди.

Эслатиб ўтамиз, “Док-1 Макс” бўйича айбланаётган 21 нафар судланувчи иши 2023 йилнинг 11 август куни Тошкент шаҳар судининг жиноят ишлари бўйича судлов ҳайъати томонидан кўрила бошланган бўлиб, суд очиқ суд мажлиси тарзида давом эттирилмоқда. Суд мажлисларида айбланувчиларнинг адвокатлари бир неча бор ОАВлар фаолиятига эътироз билдириб, суддаги маълумотлар оммага очиқланаётганидан ёзғирган. Шунингдек, улар “Кун.уз”, “Қалампир.уз” нашрларини айбсизлик презумпсиясига амал қилмасликда айблаган бўлса, “Газета.уз” нашрини суд жараёнларини онлайн тарзда ёритишда айблаб, фаолиятини чеклаган. Шундан сўнг судда ушбу нашр вакиллари иштирок этмаяпти.