“Қасос ўти”: Машҳур ҳинд фильмининг суратга олиниш тарихи ҳақида қизиқарли фактлар

Ҳинд киноижодкорлари 1983 йилда Австралиянинг “Эдемга қайтиш” сериали ремейки бўлган “Қасос ўти”ни тақдим қилган. Фильмнинг яратилиши ҳақидаги маълумотлар кўплаб томошабинлар учун қизиқ бўлиши аниқ.

Рекҳа Болливудда машҳурликка эришишидан олдин кўплаб қийинчиликларни бошдан кечирган. Актриса “Уй” ва “Тақдир ҳукмдори” каби фильмлардаги роллари орқали танилмасидан олдин 50 дан ортиқ фильмларда суратга тушган.  

1980 йиллар Рекҳа ҳаётида ижодий фаол даврлар бўлди. Актриса “Опа-сингиллар” (1980 йил) ва “Умрао Жаан” (1981 йил) фильмларида суратга тушганидан кейин мукофот билан тақдирланган, бироқ шу билан бирга у иштирок этган айрим фильмлар муваффақиятсизликка учради. Орадан кўп ўтмай ҳинд кино оламида янги актрисалар — Шридеви ва Мадҳури Дикшит пайдо бўлганлиги сабабли Рекҳа ўзининг 1-рақамли актриса мақомини йўқотди.

1988 йил уни шон-шуҳрат чўққисига қайтарди. Ёзувчи Ёсир Усмон “Рекҳа: Айтилмаган ҳикоя” асарида “Қасос ўти” драмаси “унинг бутун ҳаётидаги энг яхши роли бўлганини” таъкидлайди. Фильмни Рекҳанинг “Опа-сингиллар” (1980 йил) фильмидаги партнёри, актёр Ракеш Рошан суратга олган.

“Қасос ўти” фильмида Рекҳа икки нафар кичкина боласи билан ёлғиз қолган Арти исмли бева аёл ролини ўйнаган. У бойнинг ёлғиз қизи, бироқ болалари билан фермада камтарона ҳаёт кечиради.

Артининг отасидан норози ходим Хиралол (Кадер Хон ижросида) уни ўлдиради. Орадан вақт ўтиб Артига ўзининг келишган жияни Санжайни (ушбу ролни Кабир Беди ижро этган) таништиради.

Пулга ташна Санжай Артига қойил қолади ва унга турмуш қуриш таклифини беради. Бу воқеанинг эртасига Арти, унинг дугонаси ва Санжай кўлга боради. Санжай Артини тимсоҳлар кўп бўлган сувга итариб юборади. Сув қонга тўлганидан кейин Санжай Артини ўлган деб тахмин қилади.

Бироқ, Артининг ўлимини тасдиқловчи танаси бўлмаса, Санжай етти йил давомида унинг бойлигидан фойдалана олмайди. Шундан кейин Санжай атрофдагиларга ўзининг ҳақиқий қиёфасини кўрсата бошлайди. Бу пайтда Арти меҳрибон инсоннинг ёрдами туфайли мўжизавий тарзда тирик қолади. Бироқ у ойнага қарагач, даҳшатга тушади.

Арти оғир вазиятда ўзини қўлга олади, олмос сирғаларини сотади ва уни таниб бўлмас даражада ўзгартирадиган пластик жарроҳлик амалиётини бошдан кечириш учун чет элга боради. Ҳиндистонга қайтган Арти ўзини машҳур модел Жёти қилиб кўрсатиб, Санжайдан қасос олишга қарор қилади.

Фильм сюжети Австралиянинг “Эдемга қайтиш” мини-сериалидан олинган. Артининг кўлга ташлаб юборилиши, унинг омон қолиши ва замонавий макияж ва ранг-баранг костюмлар билан модага қайтиши саҳналари лойиҳанинг асл нусхасидан олинган. “Эдемга қайтиш” фильмидаги Стефани (Ребекка Жиллинг ижросида) ҳам унинг “ўлими” учун мотам тутадиган содиқ итга эга бўлган.

Рекҳа фильмда суратга тушганида атиги 34 ёшда бўлган. Бироқ ўша пайтда Болливудда бу ёш актрисалар учун катта ёш деб ҳисобланган. Актриса фильмда иккита — оддий Арти ва гўзал модел Жёти ролини ўйнаши керак эди.

“Ракеш Рошан Рекҳанинг жозибали қиёфасини моҳирлик билан яратган. Фильм Болливуднинг одатий шаблонли бурилишлари билан безатилган эди”, — деб ёзади Усмон. Иккинчи қисмдаги Рекҳанинг гардероби ҳозирда эскирган кўринади, аммо бу 1980 йилларнинг модаси эди. Шунга қарамай, ўша пайтдаги томошабинларга фильм жуда ёқди.

Ушбу картина “Эдемга қайтиш” нинг ремейкида қақнус қушидек қайта туғилган ва оммани ўзининг шиддати билан лол қолдирган Рекханинг шон-шуҳрати гултожига айланди.

 

Унинг фильм охирида ҳаётини ўз ўрнига қайтаришни талаб қиладиган, ёвуз инсондан гуноҳлари учун ўч олган қаҳрамони Амитабҳ Баччан ўйнаган ролларни эслатади. Шундан сўнг, баъзилар актрисани “Леди Амитабҳ” деб аташни бошлади.

Кинокартина нафақат юқори касса йиғимлари ва танқидчиларнинг ижобий фикрлари, балки Filmfare мукофотининг еттита йўналишига номзод бўлди ва шуларнинг учтасида ғолибликни қўлга киритди. Рекҳа “Энг яхши актриса”, Сону Валия “Энг яхши иккинчи пландаги актриса” ва муҳаррир Санжай Верма “Энг яхши монтаж” йўналишида мукофотни қўлга киритди.

Бироқ, фильмдаги айрим жараёнлар силлиқ кечмаган. Бунинг сабаби, бирорта ҳам Болливуд актёри Санжай ролини ўйнашга рози бўлмаган. Ракеш Рошан салбий ролни ижро этадиган актёрни топиш қийин бўлишини биларди, бундан ташқари ушбу лойиҳада ҳам асосий эътибор актрисага қаратиларди.

У дастлаб актёр Дипак Парашарни бу ролга таклиф қилмоқчи бўлди, бироқ Рекҳа Кабир Бедини таклиф қилди. Кабир Беди ўзининг энг машҳур хорижий асари – Италиянинг “Сандокан” мини-сериалида ва Жеймс Бонд ҳақидаги фильмида суратга тушган ўша пайтда аллақачон дунё бўйлаб машҳурликка эришиб бўлганди.  

Актёр бу пайтда Гавайида бўлиб, “Магнум” сериалида суратга тушаётган эди ва режиссёр Беди ўзининг гуллаб-яшнаётган карьерасини фақатгина битта ҳинд фильми учун хорижда қолдириб, Ҳиндистонга қайтишига шубҳа қилди, аммо бари бир унга қўнғироқ қилди.

“Мен Ракешдан нима учун айнан мен бу ролни ижро этишим керак, Болливуддагилар иш ташлаяптими, деб сўрадим. У эса биздаги ҳеч бир актёр ёвуз қаҳрамон ролини қабул қилмаётганини, мен унинг охирги умиди эканлигимни айтди”, — деб эслайди Кабир. Беди уч ой вақтини оладиган лойиҳада суратга тушишга рози бўлди.

Дарвоқе, режиссёр дастлаб Житендрани Артининг турмуш ўртоғи эпизодик ролини ўйнашини режалаштирган, бироқ у ўша кунларда жуда банд бўлган, шу боис Ракеш Рошан бу ролни ўзи ижро этган.

У Анита Ражни Нандини ролида кўришни орзу қилган, бироқ актриса салбий рол ўйнашни истамагани учун рад жавобини берган. Унинг бу ролни рад этиши 1985 йилги “Ҳиндистон гўзали” Сону Валияга қўл келди ва унга нафақат мукофотлар ва томошабинлар муҳаббатини, балки суратга олиш майдончасида Кабир Бедининг муҳаббатини ҳам келтирди.

“Ракеш Рошан суратга олиш жараёнида яна бир қанча қийинчиликларга дуч келди. Масалан, Рекха ва Шатругҳан Синҳа ўтмишдаги келишмовчиликлар туфайли бир-бирлари билан гаплашишмаган ва режиссёр уларни яраштиришга уринган бўлса-да бу иш уддасидан чиқа олмаган.

Кабир Бедининг сценарийдан кўнгли тўлмаган ва фильмдаги воқеаларга ўзгартириш киритишни бир неча бор сўраган. Ракеш Рошан баъзи саҳналарга ўзгартириш киритди, аммо умуман олганда сюжет бўйича ўз позициясида қолди. 

“Қасос ўти” фильми турли тилларда қайта ишланган. Унинг телугу тилидаги Сухани ролини ижро этган “Гаутами”, Радҳика иштирокидаги тамил тилида “Ўзгаришлар шамоли” каби вариантлари бор.

Кинокартинада 1981 йилда турмуш ўртoғи билан яхтада сузиб кетаётганда сирли шароитда вафот этган америкалик актриса Натали Вуднинг ўлими очиқ тасвирлангани айтилади.