Болливуднинг машҳур мелодрамаси «Бобби» 1975 йилда намойиш этилган ва Совет Иттифоқи прокатида чиққанидан сўнг 62 миллионга яқин киши томоша қилган. Бу совет томошабинлари кўрган биринчи ҳинд фильми эди. Шунинг учун ҳам у худди биринчи муҳаббат каби томошабинлар қалбидан алоҳида жой олган. Димпл Кападия миллионлаб одамларнинг қалбини забт этди — лекин унинг ҳам қалбини забт этган борми? «Бобби» юлдузи Димпл Кападиянинг карьераси, фарзандлари ва шахсий ҳаёти ҳақдаги саволларга «Новий очаг» нашри жавоб берди.
Отасининг қиздан юз ўгириши
«Бобби» юлдузига айланган Димпл Кападияни кўпроқ ўзининг эмас, балки қаҳрамонининг исми билан эслашади. Актриса 1957 йил 8 июнда Бомбейда тадбиркор Чунибхаи Кападия ва унинг рафиқаси Битти оиласида туғилган. Чунибхаи бадавлат, консерватив исмоилийлар оиласидан бўлиб, кейинчалик қизи «Бобби» фильмида рол ўйнагани учун ундан юз ўгирган. Бўлажак актрисага гўдаклик даврида Димпле Амина деб исм беришган, аммо бундан кўпчилик деярли бехабар.
Димпл 1973 йилда «Бобби» фильмида рол ижро этганида жуда ёш, атиги 16 ёшда эди. Димплнинг партнёрини эса таниқли режиссёр Раж Капурнинг ўғли Риши Капур ижро этган.
Бюджети кам, аммо прокати рекорд
Тақдир тақазоси билан режиссёр Раж Капурнинг аввалги «Менинг исмим масхарабоз» фильми кассада муваффақиятсизликка учради, шунинг учун «Бобби» жуда кам маблағ эвазига суратга олиниши керак эди. Машҳур ҳинд актёри Пран бу фильмда атиги 1 рупийга суратга тушишга рози бўлди. Турли ижтимоий гуруҳларга мансуб икки ўсмирнинг севгиси ҳақидаги бу кам бюджетли лойиҳа нафақат Ҳиндистонда, балки бутун дунёда катта қизиқиш билан томоша қилинган. «Бобби» мелодрамасини Совет Иттифоқида 62,6 миллион нафар инсон томоша қилган, шундан сўнг у совет кино прокати тарихида энг кўп ташриф буюрилган олтинчи хорижий фильмга айланган. Димпл Кападия эса «Энг яхши актриса» номинацияси бўйича Filmfare мукофотини қўлга киритган.
Боббининг хол-хол либослари
Бобби ролини ўйнаган ёш актриса бир зумда машҳур шахс бўлиб уйғонди. Унинг фильмдаги либослари Ҳиндистондаги ёшлар модасининг тимсолига айлантирди. Кейинчалик, хол-хол либослар «Боббй принт» деб номланди.
16 ёшида турмушга чиқди ва кинони тарк этди
Одатда кино оламига эндигина кириб келган актрисалар ўз карьерасини қуриш учун қатъий ҳаракат қилади. Аммо Кападия ҳаммани ҳайратда қолдирди. 1973 йилда стандартларга кўра ҳали ўспирин саналган қиз машҳур ҳинд кино актёри — 30 ёшли Ражеш Ханнага турмушга чиқди. Бобби ҳаётда ўзининг экрандаги қаҳрамонидан анча фарқ қилар эди. У Ханнанинг мухлиси эди ва севгиси учун ҳамма нарсага рози бўлди. Шундан кейин актриса эрига итоат қилган ҳолда кинодаги карьерасини якунлади. Улар икки қиз фарзанд кўрди: Твинкл ва Ринк — Димплнинг қизлари ҳам кейинчалик кино соҳасини танлади.
Турмуш ўртоғи ва ўзи орасидаги тенгсизлик ҳамда вафосизлик
Жуфтликнинг оиласида тинчлик ҳукм сурмади. Кейинроқ актриса ўз интервьюсида «Бизнинг уйимиздаги ҳаёт ва бахт Ражеш билан турмуш қурган куниёқ ниҳоясига етди», — деб айтиб ўтган. Турмуш ўртоғи билан ёш орасидаги тенгсизликка чидашига мажбур бўлгани етмаганидек, актриса унинг хиёнатидан ҳам нолиган. 9 йилдан сўнг, 1982 йилда Кападия Ханна билан ажрашди ва қизлари билан ота-онасининг уйига қайтиб келди. Орадан икки йил ўтгач, у яна суратга олиш майдончасида ижодни бошлади.
Аммо улар расман ажрашмаган
Қизиғи шундаки, Ханна ва Кападия расмий равишда ажрашмаган. Улар бир-бири билан тил топиша олмаган бўлса-да, яна қайта ярашди ва жуфтликни зиёфатларда бирга кўришди. Ажримдан кўп йиллар ўтгач, актрисадан яна турмуш қуришни хоҳлайсизми, деб сўрашганда Кападия шундай жавоб берди: «Мен жуда ҳам бахтлиман ва ҳаётимдан мамнунман. Турмуш қуришга келсак, бир мартаси етади».
2012 йил бошида Ханна саратон касаллигига чалинганида, Кападия унинг ёнида бўлди ва ўша йилнинг 18 июлида вафот этгунга қадар собиқ эрини парваришлади. Кейинчалик у Ханнанинг ўлими уни вайрон қилганини яшириб ўтирмади.
Экранларга қайтиш
Димплнинг кинога қайтиши жуда муваффақиятли тарзда кечди. 1984 йилдан 1994 йилгача бўлган ўн йил давомида у ҳинд тилида сўзловчи етакчи актрисалардан бири бўлган. 1985 йилда у ўзининг Боббидаги партнёри Риши Капур билан «Муҳаббат денгизи» романтик драмасида рол ўйнади. Ушбу фильм учун актриса иккинчи марта Filmfare мукофотига сазовор бўлди.
Шундан сўнг Болливуд фильмларидан роллар унинг устига ёғилди. Бундан ташқари, агар илгари режиссёрларни ёш қизнинг гўзаллиги ўзига жалб қилган бўлса, энди улар катта ёшли актрисада ажойиб драматик истеъдодни кўришди. Кападия тез орадан қайта тиклаган карьерасини турли-туман образлар билан бойитди.
Ўтган йиллар давомида актриса 52 та фильмда суратга тушди. Улар орасида ҳам тижорий, ҳам хусусий кинолар бор эди. Шунингдек, уларнинг ҳаммаси ҳам Болливуд фильмлари эмасди. Шундай қилиб, Димпл 1991 йилда режиссёрлар Геннадий Василев ва Шаши Капур томонидан суратга олинган «Қора шаҳзода Ажуба» совет-ҳинд илмий фантастика фильмида рол ўйнади. 2020 йилда режиссёр Кристофер Ноланнинг иштирокидаги «Далил» шов-шувли фильми намойиш этилди.
«У ҳар бир саҳнани ўғирлайди»
«Далил» фильмида Кападия қурол сотувчи Прия ролини ўйнади. Кристофер Нолан актриса билан кастинг натижаларидан шунчалик ҳайратда қолганки, у ўйлаб ҳам ўтирмасдан уни фильмидаги интригага бой роллардан бирига олди. «Далил» бутун дунё бўйлаб 362 миллион доллар йиғиб, 2020 йилнинг энг кўп даромад келтирган тўртинчи фильмига айланди. Танқидчилар Кападиянинг ижросини мақтади, улардан бири ҳаттоки Димпл ҳақида «ўзи иштирокидаги ҳар бир саҳнани сездирмасдан ўғирлайди» деб айтган, томошабин эътиборини ўзига жалб қила олишини назарда тутиб. Актриса ҳам ўзининг кинога бўлган иштиёқини қайтарган айнан «Далил» фильми эканини таъкидлайди.
Ўтмишдаги Бобби
Димпл уни доимий равишда Боббининг қиёфаси билан солиштиришларидан безовталанар эди. Кападиянинг сўзларига кўра, уни кўпинча ўта қатъий ва ғамгинликда айблашади. Бироқ у ҳар доим ўз камчиликларини яхшилашга интилади: «Мен табиатан ғамгинман. Лекин ҳеч қачон била туриб ҳеч кимни хафа қилмаганман».
Димплнинг санъатни яхши кўриши, расм ва ҳайкалтарошлик билан тажриба ўтказиши кўпчиликка маълум. 1998 йилда у ўз дизайни бўйича шам ишлаб чиқарувчи компанияга асос солди, у шам билан ижод қилувчи рассом билан машғулотлар ўтказиш учун Уэльсга борди. Кападия ўз уйини ва у билан боғлиқ ҳамма нарсани яхши кўради, бўш вақтларида у шунчаки дам олишни ёки китоб ўқишни ёқтиради.
Изоҳ (0)