Давлат хавфсизлик хизмати ходимлари томонидан Самарқанд, Сурхондарё ва Андижон вилоятларида ноқонуний ер савдоларига чек қўйилди.
Хусусан, ДХХнинг Самарқанд вилояти бўйича бошқармаси ходимлари томонидан бошқа ҳуқуқни муҳофаза қилувчи идоралар билан ҳамкорликда тезкор тадбир ўтказилган. Тадбирда Каттақўрғон туманида яшовчи 56 ёшли фуқаро иссиқхона қурмоқчи бўлган шахснинг ишончига кириб, унга давлат захирасида бўлган 1 гектар ер майдонини 150 минг доллар эвазига мансабдор танишлари имкониятлари орқали олиб беришни ваъда қилгани анқиланган.
Шунингдек, у 9 минг доллар эвазига ушбу ерни кадастр тизимидаги танишлари ёрдамида унинг номига расмийлаштириб беришини айтиб, жами 159 минг доллар олган вақтида ашёвий далиллар билан ушланган.
Пахтачи туманида кузатилган ҳолатда эса 41 ёшли шахс ўз онасига тегишли бўлган фермер хўжаликнинг 10,45 гектар ер майдонини мевани қайта ишлаш заводи қурмоқчи бўлган тадбиркорга 900 миллион сўмга сотишга келишиб, олдиндан 13 минг доллар олган вақтида қўлга олинган.
Бундан ташқари, ДХХ Сурхондарё вилояти бўйича бошқармаси ҳамда Бош прокуратура ҳузуридаги департаментнинг ҳудудий бошқармаси билан ҳамкорликда тезкор тадбир ўтказилган. Тадбирда Шўрчи туманидаги боғдорчиликка ихтисослашган фермер хўжаликда ишчи бўлиб фаолият юритувчи, муқаддам судланган шахс мазкур хўжаликнинг 50 сотих ер майдонини харидорга 45 минг долларига сотишга келишиб, 40 минг доллар олган вақтида ушланган.
Андижон вилоятида ўтказилган тезкор тадбирда эса Асака туманида яшовчи шахс боғдорчиликка ихтисослашган фермер хўжаликка тегишли 24 сотих ерни харидорга келгусида турар-жой қуриш учун ҳужжатларини расмийлаштириб бериш билан 22,5 минг долларга сотган вақтида ушланган.
Ҳозирда мазкур шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Изоҳ (0)