Наманган ва Андижон вилоятларида ер майдонлари савдоси билан боғлиқ фирибгарлик ҳолатлари фош этилди, деб хабар беради Бош прокуратура ҳузуридаги департамент.
Қайд этилишича, департамент ҳамда ДХХнинг Андижон вилояти бошқармалари томонидан тезкор тадбир ўтказилган. Тадбирда Асака туманидаги “Б.Д.” фермер хўжалиги раҳбари Р.У. ва фуқаро А.С. ўзаро тил бириктириб, икки нафар фуқарога бошқа фермер хўжалигига қарашли 12 сотих ер майдонини 15,6 минг АҚШ долларига уй-жой қуриш учун сотишга келишгани аниқланган. Бундан ташқари, улар танишлари ёрдамида кадастр ҳужжатларини расмийлаштириб беришини айтиб, 10,2 минг доллар ва 63 миллион сўмни олган вақтларида ашёвий далиллар билан ушланган.
Шу каби, департаментнинг Наманган вилоят бошқармаси томонидан ўтказилган тезкор тадбирда, М.Қ. исмли шахс фуқаро Д.О.га танишлари ёрдамида 10 минг АҚШ доллари эвазига Косонсой тумани “Ғўрмирон” МФЙдаги “Қ.Ш.” фермер хўжалигига қарашли 1 гектар ер майдонини чорвачилик йўналишида фойдаланиш учун ҳужжатларини расмийлаштириб беришини айтиб, 5 минг доллар ва 11,7 миллион сўмни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Ноқонуний ер савдолари
Бир неча кун олдин Сирдарёда беш гектар ер майдонини 40 минг АҚШ долларига сотишга уринган опа-ука қўлга олинган эди. Апрель бошларида эса Навоийда 80 гектар ерни 1 миллиард сўмга сотишга уринган шахслар қўлга олингани, Самарқанд ва Фарғонада ноқонуний ер сотиш ҳолатларига чек қўйилгани тўғрисида хабар берилганди. Шунингдек, Қорақалпоғистон Республикаси ва Бухоро вилоятида ер майдонлари савдоси билан боғлиқ фирибгарлик ҳолатлари фош этилганди.
Изоҳ (0)