Кремль матбуот хизмати Владимир Путин ва Озарбайжон президенти Илҳом Алиевнинг телефон орқали мулоқот қилгани ҳақида хабар берди.
Хабарда айтилишича, суҳбат чоғида, Алиев “20 сентябрь куни Қорабоғда Россия тинчликпарвар қўшинларининг фожиали ҳалок бўлгани муносабати билан узр сўраган ва чуқур ҳамдардлик билдирган”.
Озарбайжон президенти, шунингдек, воқеа бўйича чуқур текширув ўтказилишига ҳамда “барча айбдорлар муносиб жазоланишига” ваъда берган. Бундан ташқари, Алиев қурбонларнинг оилаларига моддий ёрдам беришга тайёрлигини айтган.
Кремль матбуот хизмати Путиннинг жавоби қандай бўлгани ҳақида хабар бермади. Бундан ташқари, хабарда фақатгина президентлар “минтақадаги вазиятни янада барқарорлаштириш ва гуманитар муаммоларни бартараф этиш бўйича устувор қадамларни” муҳокама қилгани, Путин “арманларнинг ҳуқуқлари ва хавфсизлигини таъминлаш муҳимлигини таъкидлагани”, Алиев эса Озарбайжон томони бу масалаларда Россия тинчликпарвар кучлари билан ҳамкорлик қилишга тайёрлигини тасдиқлагани айтилган.
20 сентябрь куни кечқурун Россия Мудофаа вазирлиги Қорабоғда россиялик ҳарбийлар бўлган автомобиль ўққа тутилгани ва улар ҳалок бўлгани ҳақида хабар берди. Машинада қанча одам бўлгани айтилмаган, ҳалок бўлганларнинг шахси ҳам ошкор этилмаган. 21 август куни қурбонлар орасида Россиянинг Қорабоғдаги тинчликпарвар контингенти қўмондони ўринбосари Иван Ковган ҳам борлиги маълум бўлди.
“РИА Новости”, “Интерфакс” ва “ТАСС” нашрлари Россия ҳуқуқ-тартибот идораларидаги манбага таяниб, Қорабоғда россиялик ҳарбийларни ўлдиришда гумон қилинган биринчи шахслар қўлга олингани ҳақида хабар берди.
Манбанинг айтишича, ушбу қотилликда қўл остидагилари айбдор бўлган Озарбайжон Қуролли кучлари корпуси қўмондони ўз вазифасидан четлаштирилган. Озарбайжон томони бу маълумотни ҳали тасдиқламади.
Изоҳ (0)