Россиянинг Украинага кенг кўламли босқини бошланганидан буён миналар ва портловчи қурилмалар 246 нафар тинч аҳолининг ҳаётига зомин бўлди. Улар орасида 13 нафар бола бор. Бундан ташқари, 521 киши жабрланган, улардан 53 нафари — болалар. Бу ҳақда 20 сентябрь куни Украина Мудофаа вазирлигининг Миналар, фуқаро муҳофазаси ва атроф-муҳит хавфсизлиги бош бошқармаси миналарга қарши кураш бошқармаси бошлиғи, полковник Олег Шуварский брифингда маълум қилди.
Унинг қайд этишича, Мудофаа вазирлиги Украина ҳудудини тезроқ тозалаш учун барча имкониятларни ишга солмоқда.
Шуварскийнинг сўзларига кўра, Мудофаа вазирлиги ҳудудларни миналардан тозалашда, жумладан иттифоқчиларнинг техникаларидан ҳам фаол фойдаланмоқда. Улар Киев, Чернигов, Суми, Житомир, Харьков, Николаев ва Херсон вилоятларининг озод қилинган ҳудудларини миналардан тозалаш ва портловчи объектларни зарарсизлантиришда ёрдам бермоқда
“Миналарни портлатиш ёки йўқ қилиш учун мўлжалланган 20 дан ортиқ механизациялашган воситалар қўлланмоқда. Улар 30 сантиметргача чуқурликдаги миналарни зарарсизлантиришга қодир. Айримлари масофадан туриб ишлайди”, — деди у.
Харьковлик муҳандислар томонидан ишлаб чиқилган мина тозалаш машинасига сертификат берилган.
Аввал Швейцария Киев ҳукуматига масофадан бошқариладиган мина тозалаш машинаси, тиркамали юк машинаси ва уч йилга етадиган эҳтиёт қисмларини бериши хабар қилинганди. Ушбу техник воситаларнинг умумий қиймати 1,2 миллион франкни (1,35 миллион доллардан ортиқ) ташкил этади.
Изоҳ (0)