Эрон масжидидаги теракт: Ҳужумда айбланган тожикистонлик қатл қилиниши мумкин

Эроннинг Шероз шаҳрида 10 сентябрь куни Шоҳ Черах масжидига уюштирилган ҳужум иштирокчилари устидан суд жараёни бошланди. Бу ҳақда Меhr News хабар берди.

2023 йил 13 август куни шиа зиёратгоҳида содир этилган ҳужумда икки киши ҳалок бўлган, етти киши яраланган. Асосий айбланувчи Тожикистон фуқароси Раҳматулло Наврўзов ҳисобланади. Унинг шериклари Ҳабибулло Арабзода ва Амрулло Назарий ҳам ҳужумда айбланмоқда. Улар қайси давлатдан экани ҳақида маълумот берилмаган.

Шероз прокуратураси вакили Раҳматулло Наврўзовни биринчи даражали жиноятда: худосизлик ва ИШИД террорчилик гуруҳига аъзоликда айбдор деб топишга чақирган. Прокурор суддан Наврўзовга ушбу айбловлар бўйича энг оғир жазо — ўлим жазосини тайинлашга чақирди.

Биринчи суд мажлисида Наврўзовнинг ўзи сўроққа тутилган.

У ИШИДга ижтимоий тармоқлар орқали қўшилганини айтган. Унга Салмон Асламёр тахаллусини бериб, Туркияга боришни буюришган. Туркиядан ноқонуний равишда Эронга, сўнгра Покистонга, у ердан Афғонистонга кириб, жангарилар лагерида ҳарбий тайёргарликдан ўтган.

Унинг сўзларига кўра, ҳарбий тайёргарликни тамомлаб, Эронга жўнатилган ва у ерда бир муддат Шоҳ Черах масжиди ёнидаги уйда яшаган.

Наврўзовнинг сўзларига кўра, ИШИД эмиссарлари унга масжидга ўт қўйиш ва диндорларни отиб ташлашни буюрган. Натижада у масжидга бензин билан келган, бироқ гиламларга ўт қўйишга улгурмай қўлга олинган.

Ҳужумчининг олдида автомат бўлган ва у 11 марта ўқ узган. Оқибатда икки кишининг ўлимига ва яна етти кишининг яраланишига сабаб бўлган.

“Мен ҳибсга олинишимни билмасдим, ўлдиришади, деб ўйладим. Нишонга олган одамларнинг сонини ҳисобламадим, ниятим охирги патронгача операцияни давом эттириш эди”, — дейди у.

ИШИД Шероздаги ҳужум учун жавобгарликни ўз зиммасига олган ва буни 2022 йил 26-октябрда Шоҳчорўғ мақбарасига уюштирилган ҳужум учун ўлимга ҳукм қилинган икки жангарисининг қатл этилгани учун қасос деб атаган. Ушбу ҳужумда 13 киши ҳалок бўлган, яна 27 киши яраланганди.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.