19 сентябрь куни Озарбайжон президенти Илҳом Алиев АҚШ Давлат департаменти раҳбари Энтони Блинкен билан телефон суҳбати ўтказгани ҳақида хабар берилганди. Музокараларда Алиев тан олинмаган Тоғли Қорабоғда бошланган “аксилтеррор” операцияси у ердаги арман ҳарбийлар қуролларини топширсагина, тўхтатилишини айтган. Бу ҳақда Озарбайжон раҳбари сайтида маълум қилинди.
Алиев операция сабаблари сифатида Арманистон ҳарбийлари томонидан Озарбайжон ҳарбийларининг ўққа тутилиши ва саботаж, шунингдек, Қорабоғда “президентлик сайловлари” ўтказилишини санаган.
“Ушбу ҳаракатлар Арманистон ва улар томонидан яратилиб, қўллаб-қувватлаётган сепаратистик ташкилот томонидан Озарбайжон суверенитетига қарши қасддан уюштирилган провокацияларнинг давоми бўлмоқда”, — дейилади ҳисоботда.
Операция “шундай провокацион ҳаракатларининг олдини олиш учун” бошланган.
Қорабоғда жанговар ҳаракатлар бошланишидан олдин Арманистон ва Озарбайжон бир-бирини ўт очиш ва провокацияларда бир неча бор айблаган. Ереван тан олинмаган республика ҳудудида арман ҳарбийлари йўқлигини таъкидламоқда.
Алиевнинг сўзларига кўра, ҳарбий амалиётлар давомида “фақат қонуний ҳарбий нишонлар йўқ қилинади”, тинч аҳоли ва инфратузилмага ҳужум қилинмайди.
“Минтақадаги арманлар бир неча бор Боку билан мулоқотга таклиф қилинди, бироқ аҳоли буни рад этди”, — деди Озарбайжон раҳбари.
Блинкен Бокуни зудлик билан ҳарбий ҳаракатларни тўхтатиб, мулоқотга қайтишга, жумладан, Тоғли Қорабоғ аҳолиси вакиллари билан мулоқотга қайтишга чақирган. Қайд этилишича, Алиев бунга тайёрлигини билдирган.
Давлат котиби Арманистон бош вазири Никол Пашинян билан ҳам музокаралар олиб борган ва унга Вашингтон Арманистон суверенитети, мустақиллиги ва ҳудудий яхлитлигини қўллаб-қувватлашини маълум қилган. Пашиняннинг веб-сайтида айтилишича, у Блинкен билан “кескинликни пасайтириш учун халқаро механизмлардан фойдаланиш зарурати” ҳақида ҳам гаплашган.
Тоғли Қорабоғдаги вазият
19 сентябрь куни Озарбайжон Мудофаа вазирлиги Қорабоғда конституциявий тузумни тиклаш учун “маҳаллий аксилтеррор чоралари”ни бошлагани ҳақида хабар берди. Бу арман томонининг провокациялари, жумладан, Аҳмадбейли—Фузули—Шуша трассасида автомобиль портлаши оқибатида полиция ходимларининг ҳалок бўлиши билан изоҳланган.
Озарбайжон Мудофаа вазирлиги арманистонлик аскарлар томонидан ўрнатилган миналарнинг портлаши оқибатида етти нафар озарбайжонлик ҳарбий ҳалок бўлганини маълум қилган. Пашинян Тоғли Қорабоғда “ҳарбий операция” ўтказиш учун Арманистон ҳеч кимга мандат бермаганини айтган.
Тоғли Қорабоғдаги вазият фонида Арманистонда давлат тўнтаришига чақириқлар бошланган. Ереванда Қорабоғнинг берилишига қарши намойишлар авж олган.
Изоҳ (0)