Озарбайжон ҳарбийлари тан олинмаган Тоғли Қорабоғ республикаси ҳудудида маҳаллий аксилтеррор тадбирларини бошлади. Бу ҳақда Озарбайжон Мудофаа вазирлиги баёнотида маълум қилинди.
“Уч томонлама баёнот қоидаларини таъминлаш, Қорабоғ иқтисодий районида кенг кўламли провокацияларни бостириш, Арманистон қуролли кучларини қуролсизлантириш ва ҳудудларимиздан олиб чиқиш, уларнинг ҳарбий инфратузилмасини зарарсизлантириш, озод қилинган ҳудудларга қайтган тинч аҳоли, қурилиш ва тиклаш ишларида қатнашаётган давлат хизматчилари ва ҳарбийларимиз хавфсизлигини таъминлаш, шунингдек, Озарбайжон конституциявий тузумни тиклаш мақсадида минтақада маҳаллий аксилтеррор чоралари бошланди”, — дейилади баёнотда
Қайд этилшича, 19 сентябрга ўтар кечаси Қорабоғда ноқонуний қуролли гуруҳлар аъзолари томонидан ўрнатилган мина икки озарбайжонликнинг ҳаётига зомин бўлган.
Шундан сўнг Озарбайжон Ички ишлар вазирлиги ходимлари “КамАЗ” автомашинасида воқеа жойига йўл олган. Бироқ улар Хўжаванд тумани ҳудудидан ўтаётганда Тагавард қишлоғида янги қурилган туннелда арман диверсант гуруҳи томонидан ўрнатилган мина портлаган. Оқибатда Ички ишлар вазирлиги ходимлари Асим Жамолзода, Рамил Ширинов, Сеймур Маҳмудов ва Хазар Заманов ҳалок бўлган. Яна беш киши жароҳат олиб, шифохонага етказилган.
Ушбу терактлардан сўнг бошланган операциянинг бир қисми сифатида Мудофаа вазирлиги маълум қилишича, Озарбайжон ҳарбийлари “олдинги чизиқда ва чуқурликда юқори аниқликдаги қуроллардан фойдаланган ҳолда Арманистон қуролли кучлари бўлинмаларининг позицияларини, уларнинг узоқ масофага ўқ отиш пунктларини, шунингдек, жанговар воситалар ва ҳарбий объектларни яроқсиз ҳолга келтиради”.
Фуқаролик объектлари ва тинч аҳоли нишонга олинмайди, дейилади баёнотда.
Озарбайжон ОАВлари Степанакерт (Хонканди) шаҳри ҳудудида Арманистон Қуролли кучларининг “Тор” зенит-ракета мажмуаси йўқ қилингани лаҳзаси акс этган видеони эълон қилди.
“Арманистон янгиликлари” тан олинмаган республика парламенти аъзосига таяниб, Степанакертда алоқа йўқолгани “болаларни мактабдан олиб кетиш учун машиналар йўқлигини” ёзди: “Уруш. Ярим соатдан бери отишма давом этмоқда”.
Изоҳ (0)