АҚШ Озарбайжоннинг Тоғли Қорабоғдаги ҳарбий ҳаракатларидан қаттиқ хавотирда ва Бокуни бу ҳаракатларни зудлик билан тўхтатишга чақиради, деди АҚШ Давлат котиби Энтони Блинкен 19 сентябрь куни кечқурун эълон қилган баёнотида.
“Бу ҳаракатлар Тоғли Қорабоғдаги шусиз ҳам оғир гуманитар вазиятни янада ёмонлаштириб, тинчлик истиқболига путур етказмоқда. Биз Озарбайжонга аввал айтганимиздек, низоларни ҳал қилиш учун куч ишлатиш — номақбул ҳамда минтақада адолатли ва муносиб тинчлик ўрнатиш учун шароитлар яратишга қаратилган саъй-ҳаракатларга зиддир”, — таъкидлайди АҚШ ташқи сиёсат департаменти раҳбари.
“Биз жанговар ҳаракатларни зудлик билан тўхтатиш, Боку ва Тоғли Қорабоғ аҳолиси вакиллари ўртасида ҳурмат билан мулоқот ўрнатишга чақирамиз”.
Арманистон ва Озарбайжон раҳбарлари билан музокаралар
Кейинроқ АҚШ Давлат департаменти матбуот котиби Метю Миллер Энтони Блинкен 19 сентябрь куни Арманистон бош вазири Никол Пашинянга телефон қилиб, Қўшма Штатлар “Арманистон суверенитети, мустақиллиги ва ҳудудий яхлитлигини тўлиқ қўллаб-қувватлашига” ишонтирганини маълум қилди.
Шу куни Америка дипломатияси раҳбари Озарбайжон президенти Илҳом Алиев билан ҳам телефон орқали мулоқот қилган. Миллернинг сўзларига кўра, Блинкен Алиевни Тоғли Қорабоғдаги ҳарбий амалиётларни зудлик билан тўхтатишга ва вазиятни кескинлаштирмасликка чақирди.
“Давлат котиби муаммонинг ҳарбий ечими йўқлигини, томонлар Боку ва Тоғли Қорабоғдаги этник арманлар ўртасидаги ҳал этилмаган келишмовчиликларни бартараф этиш учун мулоқотни қайта бошлаши кераклигини таъкидлади”, — деди департамент вакили.
Шу билан бирга, Энтони Блинкен Алиевнинг ҳарбий ҳаракатларни тўхтатиш ва Озарбайжон вакиллари билан Тоғли Қорабоғ аҳолиси ўртасида учрашув ўтказишга тайёрлигини айтди, деди Миллер. Ўз навбатида, АҚШ ташқи сиёсат департаменти раҳбари ушбу режани тезроқ амалга ошириш зарурлигини таъкидлади.
Озарбайжон ҳарбийларининг Тоғли Қорабоғдаги операцияси
19 сентябрь куни эрталаб Озарбайжон Тоғли Қорабоғда “аксилтеррор тадбирлари”ни эълон қилди ва тан олинмаган республика ҳудудини, жумладан, унинг пойтахти Хонканди(Степанакерт)ни ўққа тута бошлади. Боку арман қўшинларини олиб чиқиб кетиш ва минтақадаги “режим ўзгаришини” талаб қилмоқда. Айни пайтда Ереван Тоғли Қорабоғ ҳудудида арман ҳарбийлари йўқлигини даъво қилиб, Озарбайжонни “этник тозалаш”да айбламоқда.
Шу куни кечқурун Ереваннинг марказий майдонида норозилик намойишлари бошланди, унинг иштирокчилари Арманистон бош вазири Пашиняннинг сиёсати тан олинмаган Тоғли Қорабоғ республикасидаги ҳозирги вазиятга олиб келганини даъво қилди.
Россиянинг Еревандаги элчихонаси ёнида навбатдаги акция бўлиб ўтди. Йиғилганлар Тоғли Қорабоғда жойлашган Россия тинчликпарвар кучларидан минтақа аҳолисини Озарбайжон агрессиясидан ҳимоя қилишни талаб қилди.
Москванинг Тоғли Қорабоғда бўлаётган воқеаларга муносабати
Арманистон ҳукумати Россия тинчликпарвар кучлари чоралар кўришини кутмоқда, деди Никол Пашинян. “Биз БМТ Хавфсизлик Кенгаши ҳам чора кўришини кутамиз”, — дея қўшимча қилди Арманистон ҳукумати раҳбари.
Ўз навбатида Москва ҳам Бокуни, ҳам Ереванни қон тўкилишини тўхтатишга, дипломатияга қайтишга ва тинчликпарвар кучлар хавфсизлигини таъминлашга чақирди. Европа Иттифоқи Озарбайжоннинг ҳарбий ҳаракатларини қоралади.
Изоҳ (0)