Озарбайжон президенти Илҳом Алиев администрацияси Озарбайжон томони “ноқонуний арман қуролли гуруҳлари” қуролларини ташлаган тақдирда Евлах шаҳрида Тоғли Қорабоғнинг арман вакиллари билан учрашишга тайёрлигини маълум қилди. Бу ҳақда “Интерфакс Озарбайжон” хабар берди.
Баёнотга кўра, президент администрацияси бир неча бор Қорабоғ ҳудудида яшовчи арман аҳолиси вакилларини мулоқотга таклиф қилган, мақсад “реинтеграция масалаларини муҳокама қилиш” бўлган.
“Аммо улар ҳар сафар буни рад этган”, — дейилади баёнотда.
Озарбайжоннинг ҳарбий амалиётини тугатиш учун “ноқонуний арман қуролли гуруҳлари” барча қуролларини топшириши ва “оқ байроқ кўтариши”, шунингдек, “ноқонуний режим”ни тарқатиб юборишлари кераклиги айтилган.
“Акс ҳолда, аксилтеррор чоралари охиригача давом эттирилади”, — дейилади хабарда.
Аввалроқ тан олинмаган Тоғли Қорабоғ республикаси раҳбарияти Озарбайжон ҳукуматига ҳарбий ҳаракатларни тўхтатиш ва музокараларни бошлаш таклифи билан мурожаат қилганди.
Тоғли Қорабоғдаги вазият
Озарбайжон Мудофаа вазирлиги Қорабоғда конституциявий тузумни тиклаш учун “маҳаллий аксилтеррор чоралари”ни бошлагани ҳақида хабар берди. Бу арман томонининг провокациялари, жумладан, Аҳмадбейли—Фузули—Шуша трассасида автомобиль портлаши оқибатида полиция ходимларининг ҳалок бўлиши билан изоҳланган.
Озарбайжон Мудофаа вазирлиги арманистонлик аскарлар томонидан ўрнатилган миналарнинг портлаши оқибатида етти нафар озарбайжонлик ҳарбий ҳалок бўлганини маълум қилган. Пашинян Тоғли Қорабоғда “ҳарбий операция” ўтказиш учун Арманистон ҳеч кимга мандат бермаганини айтган.
“Озарбайжон Арманистонни кенг кўламли ҳарбий ҳаракатларга тортмоқчи. Озарбайжон арманларни этник тозалаш учун қуруқликдаги операцияни бошлади. Арманистон Озарбайжон билан Тоғли Қорабоғдаги вазият туфайли ҳарбий ҳаракатлар бошлаш ниятида эмас”, — деган Арманистон бош вазири Никол Пашинян.
Тоғли Қорабоғдаги вазият фонида Арманистонда давлат тўнтаришига чақириқлар бошланган. Ереванда Қорабоғнинг берилишига қарши намойишлар авж олган. Улар “Никол сотқин” деб ҳайқирмоқда.
Изоҳ (0)