Режиссёр Кристофер Ноланнинг “атом бомбасининг отаси” Роберт Оппенгеймерга бағишланган “Оппенгеймер” кинокартинаси тарихдаги энг юқори даромад келтирган биографик фильмга айланди, деб ёзмоқда “Правила жизни” нашри.
15—17 сентябрь дам олиш кунлари якунларига кўра, фильм яна 12 миллион доллар ишлаб топди ва унинг умумий тушуми 912,7 миллион долларни ташкил этди. Бу “Оппенгеймер”га кассада Брайан Сингернинг 910,8 миллион доллар тўплаган “Богемача рапсодия” (2018 йилда намойиш этилган) фильмидан ўзиб кетиш имконини берди.
Шу билан бирга, касса тушумлари бўйича “Оппенгеймер” Ноланнинг энг юқори даромад келтирган энг яхши фильмлари учлигидан жой олган. Фильм “Қора рицар” (2008 йилда суратга олинган) ва “Қора рицар: Афсонанинг қайта туғилиши” (2012 йилда томошабинларга тақдим этилган) лойиҳаларидан кейинги ўринда турибди ва бу кинокартиналарнинг ҳар бири кассада 1 миллиард доллардан кўпроқ даромад келтирган.
“Оппенгеймер” 2023 йилда энг кўп даромад келтирган фильмлар рўйхатида ҳам учинчи ўринни эгаллаб турибди. Бу рўйхатда у Грета Гервигнинг “Барби” (1,41 миллиард доллар тўплаган) ва “Супер ака-ука Мариолар” (кассада 1,36 миллиард доллар йиғган) лойиҳаларидан кейинги ўринни банд қилган.
21 июль куни “Оппенгеймер” ва “Барби” фильмларининг дунё бўйлаб премьераси бўлиб ўтди.
Маълумот учун, “Оппенгеймер” фильмида бош ролни актёр Киллиан Mёрфи ижро этган. Mёрфи The New York Times газетасига берган интервьюсида ўзини жуда озғин ва жуда оз овқат истеъмол қилган “атом бомбасининг отаси”га иложи борича кўпроқ ўхшашга ҳаракат қилгани учун ўзига овқат ейиш билан боғлиқ чеклов қўйгани ҳақида сўзлаб берган. Миш-мишларга кўра, олим кўп мартини ичган ва сигарета чеккан.
Mёрфининг суратга олиш жараёнларига жисмоний ва руҳий жиҳатдан тайёрланиши учун беш ойдан кўпроқ вақт керак бўлди. Актёр фильмдаги роли учун қанча вазн йўқотганини ошкор этмаган ва инсонларни мунтазам парҳезлар билан ўзларини қийноққа солмасликка чақирган.
Изоҳ (0)