Остона суди қозоғистонлик олигарх Қайрат Бўранбаевни мол-мулки мусодара қилинган ҳолда олти йилга озодликдан маҳрум қилди. Бу ҳақда Informburo хабар бермоқда.
“АзияГазЧунджа” бош директори Роман Наханов ҳам худди шундай жазога тортилди. ҚазақГаз бошқаруви раисининг собиқ ўринбосари Таир Жанузак беш йилга қамалди. Уларнинг учаласига ҳам умрбод давлат хизматида ишлаш ман этилди.
Informburo маълумотларига кўра, Бўранбаев Остона прокуратураси билан тузган процессуал келишувда 6 йиллик қамоқ кўзда тутилган.
“Тарафлар Жиноят-процессуал кодексининг 613-моддаси талабига асосан процессуал битимни процессуал келишув шаклида тузиш шартлари мавжудлигини тасдиқлайди. Айбланувчиларга нисбатан қийноқлар ёки бошқа шафқатсиз, ғайриинсоний ёки қадр-қимматни камситувчи муомала ёки жазо турлари қўлланмаган, улар ихтиёрий равишда айбни тан олиш тўғрисида процессуал келишув тузган ва унинг ҳуқуқий оқибатларидан хабардор.
Жабрланувчиларнинг вакиллари процессуал битимни айбни тан олиш тўғрисидаги келишув шаклида тузишга рози бўлиб, Бўранбаев, Наханов ва Жанузакка нисбатан ҳеч қандай даъволари йўқлигини билдирди”, — дея ўқиб эшиттирди прокурор Олжас Хайруллаэв.
Қайрат Бўранбаев Қозоғистоннинг энг бой ва нуфузли 50 нафар тадбиркори қаторида турарди. Унинг қизи собиқ президент Нурсултон Назарбоевнинг набираси Ойсултонга турмушга чиққан — 2020 йил август ойида Ойсултон вафот этди. Молиявий мониторинг агентлиги матбуот хизмати 2022 йил 17 март куни Бўранбаев ҳибсга олингани ҳақида маълум қилди. Тадбиркор катта миқдорда маблағларни ўзлаштиришда айбланган.
Жорий йилнинг март ойида Остона шаҳрининг 2-Сариаркин тумани суди Бўранбаевни 8 йилга озодликдан маҳрум қилди. Роман Наханов ва Таир Жанузак ҳам саккиз йиллик қамоқ жазосига ҳукм қилинди. Уларнинг барчаси газни миллий компанияга қайта сотиш вақтида 14,5 миллиард тенге ўмаришда айбдор деб топилди.
Ёзда жиноят ишлари бўйича судлов ҳайъати газ нархи кўрсатилган ҳужжатнинг асл нусхаси бўлмагани учун Бўранбаев ва бошқа айбланувчиларга нисбатан чиқарилган ҳукмни бекор қилди.
Янги ҳукм чиқиши арафасида Қозоғистон Республикаси Молиявий мониторинг агентлиги матбуот хизмати Бўранбаев ихтиёрий равишда 90 миллиард тенгедан (195,4 миллион доллар) ортиқ маблағни давлатга қайтарганини маълум қилди. У Таълим инфратузилмасини қўллаб-қувватлаш жамғармасига яна 30 миллиард тенге (65 миллион доллар) ўтказган. Агентликнинг эслатишича, тадбиркор аввалроқ табиий газ олиб киришда маблағларни ўғирлаш бўйича тергов доирасида 14,5 миллиард тенге (31,5 миллион доллар) миқдоридаги зарарни ҳам қоплаган.
Изоҳ (0)