Қозоғистонда йиллик инфляция кетма-кет олтинчи ой пасаймоқда. Бу ҳақда Қозоғистон республикаси Миллий банки раиси Тимур Сулейменов маълум қилди. У 2023- йилда инфляция даражаси 13,1 фоизни ташкил этганини айтди.
“Йиллик инфляцияга озиқ-овқат ва ноозиқ-овқат маҳсулотларининг ҳиссаси пасаймоқда, пуллик хизматлар инфляцияси эса ошиб бормоқда. Йиллик инфляциянинг пасайишига қарамай, ойлик инфляция июль ойидаги 0,6 фоиздан 0,7 фоизгача тезлашди. Унинг ўсиш суръати тарихий ўртача кўрсаткичдан сезиларли даражада ошди”, — деди Тимур Сулейменов.
Амалдорнинг таъкидлашича, йил бошидан буён озиқ-овқат инфляцияси озиқ-овқат ва қишлоқ хўжалиги маҳсулотлари арзонлашиши туфайли 12,4 фоизгача пасайган.
У мева ва сабзавот маҳсулотлари мавсумий равишда арзонлашаётгани, аммо бу пасайиш даражаси одатдагидан паст эканини таъкидлади.
Ноозиқ-овқат инфляцияси секинлашмоқда ва жорий йилнинг август ойида йиллик кўрсаткичда 13,5 фоизни ташкил этди. Ўтган ойларда тенге курсининг мустаҳкамланиши фонида шахсий товарлар, уй-рўзғор буюмлари, қурилиш материаллари ва дори-дармон нархларининг йиллик ўсишининг секинлашуви кузатилмоқда.
Шу билан бирга, Миллий банк ёқилғи-мойлаш материалларининг максимал чакана нархининг ошиши ноозиқ-овқат инфляциясига ҳисса қўшаётганини маълум қилди.
Эслатиб ўтамиз, август ойида Қозоғистонда кийим-кечак, пойабзал , маиший техника, автомобиль ва газ нархларининг сезиларли даражада ошиши қайд этилган.
Бундан ташқари, уй-жой ва коммунал хизматлар нархларининг ошиши фонида пуллик хизматлар инфляцияси ўсишда давом этмоқда. Август ойида улар 6,1 фоизга, йиллик ҳисобда эса 13,9 фоизга ўсди. Тартибга солинмаган хизматларнинг эса ўсиш динамикаси давом этмоқда.
Изоҳ (0)