Қозоғистон президенти Қосим-Жўмарт Тўқаев Душанбеда бўлиб ўтаётган Марказий Осиё давлатлари раҳбарларининг V маслаҳат учрашувида минтақа мамлакатлари учун устувор йўналишларни айтиб ўтди. Бу ҳақда Оқўрдага таяниб, Tengrinews хабар берди.
“Ҳамкорликнинг аниқ йўналишлари бўйича қарашларимни тақдим этсам, биринчиси, мамлакатларимиз ўртасидаги товар айирбошлаш ҳажмини ошириш. Бу борада сезиларли натижаларни кўряпмиз. Минтақа давлатлари ўртасидаги ўзаро товар айирбошлаш изчил ўсиб бормоқда. Мамлакатларимиз яқин келажакда ўзаро товар айирбошлаш ҳажмини 15 миллиард долларга етказиш имкониятига эга”, — деди Тўқаев.
Унинг сўзларига кўра, Қозоғистон минтақа мамлакатларига 175 та норесурс товар номинациясида экспорт ҳажмини ошириши мумкин.
“Товар айирбошлаш ҳажмини кенгайтиришда асосий ҳаракатлантирувчи куч мамлакатларимиз ишбилармон доиралари бўлиши керак, деб ҳисоблайман. Шунинг учун, уларга қулай шарт-шароитлар яратиш борасидаги ишлар устувор вазифага айланиши керак. Тадбиркорлик субъектлари ўртасида тўғридан-тўғри алоқаларни ўрнатиш учун, масалан, Central Asia Gateway портали доирасида товар ишлаб чиқарувчиларнинг ягона электрон маълумотлар базасини яратишни таклиф қиламиз”, — дея таклиф қилди Қозоғистон президенти.
Тўқаев минтақа мамлакатларида саноат кооперацияси ва логистикани ривожлантириш зарурлиги ҳақида гапирди.
“Бунинг фонида озиқ-овқат, енгил товарлар ишлаб чиқариш, қурилиш ва кимё саноати бўйича кластер кооператив лойиҳаларини яратиш улкан потенсиалга эга. Шу муносабат билан Марказий Осиё давлатлари ўртасида саноат кооперациясини ривожлантириш бўйича чора-тадбирлар режасини ишлаб чиқишни таклиф қиламан”, — деди у.
Тўқаев минтақа давлатларининг транспорт-логистика салоҳиятини ривожлантириш ва тўлиқ жорий этиш зарурлигига ҳам эътибор қаратди. Сиёсатчи бу Марказий Осиё давлатларининг жадал ривожланиши учун таянч нуқтаси бўлишини илгари сурди.
“Биз дунёнинг янги иқтисодий географияси шаклланаётганига гувоҳ бўляпмиз. Хитой, Европа, Россия ва Яқин Шарқ йўналиши бўйича товар айирбошлаш ҳажмининг ортиши прогноз қилинмоқда. Марказий Осиё глобал шимол, жануб, ғарб ва шарқни боғлайдиган чорраҳада жойлашган.
Бу бизнинг жиддий устунлигимиз бўлиб, кенг истиқболларни очади. Ҳозирги босқичда Транскаспий халқаро транспорт йўналиши алоҳида ўрин тутади. Ўрта муддатли истиқболда ушбу йўлак бўйлаб ҳаракатланиш ҳажмини беш баравар ошириш мумкин. Биз рақамли ечимларни жорий этиш ва инфратузилмани модернизация қилиш орқали унинг қувватини тизимли равишда ошириш ниятидамиз”, — таъкидлади Қозоғистон раҳбари.
Изоҳ (0)