Қозоғистон президенти Қосим-Жўмарт Тўқаев мамлакат президенти сифатидаги вазифасини қандай кўришини айтди. Бу ҳақда Tengrinews хабар берди.
“Давлат аппаратининг вазифаси мамлакатда қонуний тадбиркорлик фаолиятига ҳар томонлама кўмаклашишдан иборат. Қонунни бузган ҳолда тадбиркорлик фаолиятига ҳар қандай тўсқинлик қилиш давлат характеридаги жиноят ҳисобланади. Президент сифатида мен ўз вазифамни Қозоғистонни йирик, ўрта ва кичик бизнес юритиш учун мутлақо қулай давлатга айлантиришдан иборат деб биламан”, — деди Тўқаев ишбилармонлар билан учрашувда.
Унинг таъкидлашича, бугунги кунда суд қарорларининг 60 фоиздан ортиғи фуқаролар ва тадбиркорлик субъектларини ҳимоя қилишга қаратилган бўлса, авваллари бу кўрсаткич 15 фоиздан кам эди.
“Бу ижобий тенденция, бир томондан ҳаддан ошишга ва тебранишларга йўл қўйиб бўлмайди. Давлат аппаратининг тизимли хатолари юзасидан етарлича иш олиб борилмаяпти, бу эса тадбиркорларни судга мурожаат қилишга мажбур қилмоқда. Ҳукумат Олий суд ва Миллий тадбиркорлар палатаси билан биргаликда давлат органлари фаолиятидаги салбий ҳолатларни чуқур таҳлил қилиб, уларни бартараф этиш бўйича таъсирчан чора-тадбирлар кўриши зарур”, — деди Қозоғистон президенти.
Изоҳ (0)