Қозоғистонлик тадбиркор Қайрат Бўранбаев 90 миллиард тенгедан (195,4 миллион доллар) ортиқ суммадаги активларни ихтиёрий равишда давлатга қайтарди. Улар орасида нефть кони, газ тақсимлаш корхонаси, хизмат кўрсатиш корхонаси, меҳмонхона ва савдо-кўнгилочар мажмуалари, фитнес марказлари тармоғи, офис бинолари ва бошқалар бор. Бу ҳақда Қозоғистон Молиявий мониторинг агентлиги матбуот хизмати хабар берди.
Бўранбаев, шунингдек, Таълим инфратузилмасини қўллаб-қувватлаш жамғармасига 30 миллиард тенге (65 миллион доллар) ўтказди.
“Ушбу объектларнинг барчаси давлат органлари ва компаниялар балансига ўтказилади, маблағлар эса таълим инфратузилмасини ривожлантиришга йўналтирилади”, — дейилади хабарда.
Аввалроқ тадбиркор табиий газ олиб киришда маблағ ўғирланиши бўйича тергов доирасида 14,5 миллиард тенге (31,5 миллион доллар) миқдоридаги зарарни ҳам қоплаган, деб эслатди агентлик.
Қайрат Бўранбаев Қозоғистоннинг энг бой ва нуфузли 50 нафар тадбиркори қаторида турарди. Унинг қизи собиқ президент Нурсултон Назарбоевнинг набираси Ойсултонга турмушга чиққан — 2020 йил август ойида Ойсултон вафот этди. Молиявий мониторинг агентлиги матбуот хизмати 2022 йил 17 март куни Бўранбаев ҳибсга олингани ҳақида маълум қилди. Тадбиркор катта миқдорда маблағларни ўзлаштиришда айбланган.
Жорий йилнинг март ойида Остона шаҳрининг 2-Сариаркин тумани суди Бўранбаевни 8 йилга озодликдан маҳрум қилди. Иш бўйича яна икки айбланувчи — “АзиаГазЧунжа” бош директори Роман Наханов ва “ҚазақГаз” бошқаруви раисининг собиқ ўринбосари Таир Жанузак ҳам саккиз йиллик қамоқ жазосига ҳукм қилинди. Уларнинг барчаси газни миллий компанияга қайта сотиш вақтида 14,5 миллиард тенге ўмаришда айбдор деб топилди.
Ёзда жиноят ишлари бўйича судлов ҳайъати газ нархи кўрсатилган ҳужжатнинг асл нусхаси бўлмагани учун Бўранбаев ва бошқа айбланувчиларга нисбатан чиқарилган ҳукмни бекор қилганди. Иш апелляция суди томонидан кўриб чиқилиши кутилмоқда.
Эслатиб ўтамиз, яқинда Қозоғистонда маҳаллий ишбилармонларнинг қонуний келиб чиқишини исботлай олмаган мулкларини давлатга қайтаришига имкон берадиган қонун қабул қилинди. Мол-мулки ихтиёрий равишда ошкор қилинган ва қайтарилган тақдирда тадбиркор барча турдаги жавобгарликдан озод қилинади.
Изоҳ (0)