Ostona sudi qozog‘istonlik oligarx Qayrat Bo‘ranbayevni mol-mulki musodara qilingan holda olti yilga ozodlikdan mahrum qildi. Bu haqda Informburo xabar bermoqda.
“AziyaGazChundja” bosh direktori Roman Naxanov ham xuddi shunday jazoga tortildi. QazaqGaz boshqaruvi raisining sobiq o‘rinbosari Tair Januzak besh yilga qamaldi. Ularning uchalasiga ham umrbod davlat xizmatida ishlash man etildi.
Informburo ma’lumotlariga ko‘ra, Bo‘ranbayev Ostona prokuraturasi bilan tuzgan protsessual kelishuvda 6 yillik qamoq ko‘zda tutilgan.
“Taraflar Jinoyat-protsessual kodeksining 613-moddasi talabiga asosan protsessual bitimni protsessual kelishuv shaklida tuzish shartlari mavjudligini tasdiqlaydi. Ayblanuvchilarga nisbatan qiynoqlar yoki boshqa shafqatsiz, g‘ayriinsoniy yoki qadr-qimmatni kamsituvchi muomala yoki jazo turlari qo‘llanmagan, ular ixtiyoriy ravishda aybni tan olish to‘g‘risida protsessual kelishuv tuzgan va uning huquqiy oqibatlaridan xabardor.
Jabrlanuvchilarning vakillari protsessual bitimni aybni tan olish to‘g‘risidagi kelishuv shaklida tuzishga rozi bo‘lib, Bo‘ranbayev, Naxanov va Januzakka nisbatan hech qanday da’volari yo‘qligini bildirdi”, — deya o‘qib eshittirdi prokuror Oljas Xayrullaev.
Qayrat Bo‘ranbayev Qozog‘istonning eng boy va nufuzli 50 nafar tadbirkori qatorida turardi. Uning qizi sobiq prezident Nursulton Nazarboyevning nabirasi Oysultonga turmushga chiqqan — 2020-yil avgust oyida Oysulton vafot etdi. Moliyaviy monitoring agentligi matbuot xizmati 2022-yil 17-mart kuni Bo‘ranbayev hibsga olingani haqida ma’lum qildi. Tadbirkor katta miqdorda mablag‘larni o‘zlashtirishda ayblangan.
Joriy yilning mart oyida Ostona shahrining 2-Sariarkin tumani sudi Bo‘ranbayevni 8 yilga ozodlikdan mahrum qildi. Roman Naxanov va Tair Januzak ham sakkiz yillik qamoq jazosiga hukm qilindi. Ularning barchasi gazni milliy kompaniyaga qayta sotish vaqtida 14,5 milliard tenge o‘marishda aybdor deb topildi.
Yozda jinoyat ishlari bo‘yicha sudlov hay’ati gaz narxi ko‘rsatilgan hujjatning asl nusxasi bo‘lmagani uchun Bo‘ranbayev va boshqa ayblanuvchilarga nisbatan chiqarilgan hukmni bekor qildi.
Yangi hukm chiqishi arafasida Qozog‘iston Respublikasi Moliyaviy monitoring agentligi matbuot xizmati Bo‘ranbayev ixtiyoriy ravishda 90 milliard tengedan (195,4 million dollar) ortiq mablag‘ni davlatga qaytarganini ma’lum qildi. U Taʼlim infratuzilmasini qo‘llab-quvvatlash jamg‘armasiga yana 30 milliard tenge (65 million dollar) o‘tkazgan. Agentlikning eslatishicha, tadbirkor avvalroq tabiiy gaz olib kirishda mablag‘larni o‘g‘irlash bo‘yicha tergov doirasida 14,5 milliard tenge (31,5 million dollar) miqdoridagi zararni ham qoplagan.
Izoh (0)