Украина президенти Владимир Зеленский келаси ҳафта АҚШга бориб, Оқ уйда Жо Байден билан учрашишни режалаштирмоқда. Бу ҳақда NBC News ва Reuters хабар берди.
Хабарларга кўра, Зеленский Нью-Йоркдаги Бирлашган Миллатлар Ташкилоти Бош Ассамблеясида иштирок этади, сўнг АҚШ президенти билан учрашади.
Бундан ташқари Украина президенти Вашингтонга ташрифи давомида Конгрессда нутқ сўзлаши айтилмоқда. Таъкидланишича, ташриф Байден маъмурияти билан келишилган ва 21 сентябрь, пайшанба кунига белгиланган.
Америка ОАВ ёзишича, Конгрессда Зеленский ва Байден конгрессменларни Украинага 24 миллиард доллардан ортиқ қўшимча ёрдам кўрсатиш учун Оқ уй сўровини маъқуллашга чақирмоқчи.
2022 йил декабрь ойида Владимир Зеленский уруш бошланганидан бери илк хорижий ташрифи билан АҚШга борганди. Вашингтонда Зеленский Байден билан учрашиб, Конгрессда нутқ сўзлаган.
2023 йил 20 февраль куни АҚШ президенти Жо Байден эълон қилинмаган ташриф билан Киевга келди. Бу АҚШ президентининг сўнгги 15 йил ичида Украинага илк ташрифидир. Охирги марта 2008 йилда ўша пайтдаги президент Жорж Буш Киевга келганди. Шу билан бирга, Жо Байден илгари Барак Обама маъмуриятида вице-президент бўлиб ишлаган пайтда олти марта Киевда бўлган.
Изоҳ (0)