Ливияда сув тошқинлари оқибатида ҳалок бўлганлар сони 11,3 минг кишига етди. Бу ҳақда Ливия Қизил ярим Ой жамиятига таяниб, Associated Press хабар берди.
Гуманитар ташкилотнинг қўшимча қилишича, яна 10 минг киши бедарак йўқолган деб ҳисобланмоқда. Қидирув ишлари давом этмоқда.
10 сентябрь куни кечаси Ливияда “Даниэль” тўфони сабаб йирик сув тошқинлари кузатилди. Ёмғирлар сабаб иккита тўғон вайрон бўлди, шаҳарларни сув босди. Табиий офатдан энг кўп Дерна шаҳри жабр кўрди, расмий маълумотларга кўра, у ерда 6 минг киши бедарак йўқолган. Сув оқимлари бутун бошли маҳаллаларни Ўрта Ер денгизига оқизиб кетган.
Ал-Байда ва Суса ҳам фалокатга учради.
Сунъий йўлдош тасвирларидан Дернада саёзликдан денгизгача чўзилган лой ва қолдиқларни кўриш мумкин. Қутқарувчиларнинг айтишича, денгизга оққан кўплаб жасадларни сув оқими қайта қирғоққа чиқариб ташлаган.
Расмийлар қурбонлар сони ортишидан хавотирда.
“Ливия Соғлиқни сақлаш вазирлиги шарқда табиий офат қурбонлари сони ортишини кутмоқда. Дерна шаҳридаги вазият тобора аянчли тус олмоқда. Қурбонлар сони бўйича якуний статистик маълумотлар йўқ”, — деди вазирлик раҳбари Усмон Абдулалил.
Сиёсатчи фалокатнинг даҳшатли тафсилотларини ҳам айтиб берди.
“Дернадаги вазият ҳалокатли... Кўп жойларда ҳалигача жасадлар сочилиб ётибди. Ҳозирча уларни дафн этишнинг имкони йўқ”, — деди у маҳаллий Алмасар телеканалига.
Қизил ярим Ой вакили ёрдам сўраб мамлакатларга мурожаат қилди.
“Бизга ҳар қандай халқаро ҳамкорлик керак. Бизда тўққиз мингдан ортиқ бедарак йўқолганлар ҳақида хабар бор. Каттароқ қидирув ишларини олиб бориш керак”, — дейди у.
Расмийлар, шунингдек, воқеаларнинг даҳшатли тус олиши олдиндан прогноз қилинмагани сабабларини ўрганмоқда.
“Об-ҳаво шароити тўғри ўрганилмаган, денгиз суви ва ёғингарчилик даражаси, шамол тезлиги ўрганилмаган, бўрон йўлида қолган оилалар эвакуация қилинмаган”, — дея тан олди Ливия фавқулодда вазиятлар бошқармаси ва тез ёрдам хизмати раҳбари Усама Али.
Унинг сўзларига кўра, Ливия бундай фалокатга тайёр эмасди.
“Ливия ҳеч қачон бундай даражадаги фалокатга дуч келмаган. Камчиликлар борлигини тан оламиз”, — дея қўшимча қилди у.
Изоҳ (0)