Captiva ўзбек автомобиль ихлосмандлари учун яхшигина таниш. Мазкур авто ташқи кўриниши ва ҳайдовчи учун ўзига хос қулайликлари билан ажралиб туради.
Беш йилдан буён сотувда бўлмаган Captiva’нинг янгиланган модели октябрь ойи якунида сотувга чиқарилиши мумкинлиги ҳақида баёнот берилди. “Дарё” нашри Captiva’нинг мамлакатда ишлаб чиқарилиш тарихи, у билан боғлиқ муҳим воқейликларни жамлади.
11 йиллик умр
Дастлаб Captiva модели Ўзбекистон бозорига 2007 йилда кириб келган ва ўша йилнинг ўзида мамлакатда автомобилни йиғиш йўлга қўйилганди. То 2017 йилга қадар бир неча моделда ишлаб чиқарилган ва уни йиғиш 2018 йилда тўхтатилганди.
Орадан уч йил ўтиб янгиланган Captiva Ўзбекистон автомобиль бозорига қайтишга уринди.
Биринчи уриниш
UzAuto Motors бундан икки йил муқаддам, 2021 йилнинг кузида янгиланган Captiva кроссоверини тақдим этганди. Ўшанда автомобилнинг 4 турдаги комплектацияси: 192 миллион сўмдан то 269 миллион сўмгача бўлганди ва шартнома берила бошланган.
Автомобиль 1,5 литрли турбо двигатель, 10,4 дюймли сенсорли экран, автоматик узатмалар қутиси, электр бошқарувли рул билан жиҳозланган, ўриндиқлар soft touch материали билан қопланган.
Биттаси қайсар чиқди
Орадан икки ой ўтиб, ноябрь ойи ўрталарида харидорларга қарийб 500 га яқин шартнома берилганидан кейин тармоқларда Captiva-5 автомобили учун тўлов қилган харидорлар автосалонлар ва UzAuto Motors масъуллари билан боғланиб, уларга машина гўёки “минтақамизга тўғри келмагани учун” етказиб берилмаслиги, тўловни ё бутунлигича қайтариб олиш ёки бошқа модел хариди учун йўналтириш тавсия этилаётгани ҳақида хабарлар тарқалди.
Бунга UzAuto Motors Captiva-5 бўйича шартномалар тузишни тўхтатишга “мажбур бўлаётгани”ни эълон қилди. Олдиндан тўлов қилганларга сумманинг 5 фоизи миқдорида компенсация пули берилишини билдирган. Автонинг тўхтатилиш сабаби сифатида жаҳон бозорида яримўтказгич микрочиплар етишмаётгани келтирилган.
Ўша 500 га яқин шартнома эгаларидан қайси биридир пулини компенсация билан қайтариб олган бўлса, яна кимдир заводдан бошқа машина беришларига рози бўлди. Лекин уларнинг ичидан биттаси қайсар чиқди, охиригача борди – судлашди.
17 ой давом этган суд
Captiva-5 га пул тўлаб ололмаганлардан бири – Ўктам Қаҳҳоров автомобилини етказиб берилмаслигига сабаб сифатида айтилган “Ўзбекистон иқлимига тўғри келмаслиги” ҳақидаги важни тан олмади ва судга мурожаат қилди.
Суд иши 17 ой давом этди. UzAuto Motors бир неча марта судда ютқазди. Ҳатто бош прокурор ўринбосари Светлана Ортиқова Олий судга такрорий кассация тартибида кўриб чиқиш UzAuto Motors’нинг ёнини олиб, протест киритди.
Йиллаб давом этган суд иши 2023 йилнинг май ойига келиб якунланди. Олий суд Ўктам Қаҳҳоров фойдасига қарор чиқариб, компанияга Captiva-5 ни истеъмолчига етказиб бериш мажбуриятини юклади.
Иккинчи уриниш
Биринчи уринишдан икки йил ўтиб айни куз бошида “Ўзавтосаноат” Captiva-5 октябрь ойи якунида сотувга чиқарилиши мумкинлигини маълум қилди. Айтилишича, автомобиль агар тест жараёнидан муваффақиятли ўца, бозорга қўйилади. Машиналар Хитойдан олиб келиб, етказиб берилади.
Масъуллар аввал Ўзбекистон иқлимига тўғри келмаслиги даъво қилинган Captiva-5 яна қандай қилиб об-ҳавога мослашгани ёки маслаштирилгани юзасидан изоҳ берилмаган.
Компания Captiva-5 нархи сотув бошланишидан аввал эълон қилинганини айтган. Лекин уни Ўзбекистон автомобиль бозорларидан топиш мумкин. Интернет дўконларда Captiva-5 сотмоқчи ёки янгисини четдан олиб келиб бериши ҳақида эълонлар турибди. Уларда Captiva-5 нархи 33-35 минг доллар атрофида таклиф қилинмоқда.
Изоҳ (0)