Ерости сувлари сатҳи ва захиралари камайиб кетаётган қатор туманларда қудуқлар бурғилашга мораторий жорий этилди.
Мутахассислар хулосасига кўра, тасдиқланган миқдордан ортиқча сув олиш сув сатҳининг пасайиб кетишига ва бу захираларнинг бир неча йил ичида тугашига олиб келиши мумкин. Натижада ичимлик сув манбаси бўлган қудуқлар қурийди ва катта маблағлар ҳисобига қурилган ичимлик сув иншоотлари сув бермай қўяди.
Ер ости сувларидан фойдаланиш ва қудуқ бурғилаш тизимини такомиллаштириш, ер ости сув ресурсларини муҳофаза қилиш бўйича назоратни кучайтириш, аҳоли орасида сувдан оқилона фойдаланиш маданиятини кенг тарғиб қилиш, ер ости сувларнинг камайиши ҳамда ифлосланишининг олдини олиш мақсадида қатор ишлар амалга оширилмоқда.
Жумладан, Нурота, Нуробод, Пайариқ, Иштихон, Ургут, Қўшработ, Фориш, Зомин, Янгиобод, Шароф Рашидов, Чироқчи, Кўкдала, Косон, Косонсой, Чортоқ, Чуст, Янгиқўрғон, Бешариқ, Жалақудуқ, Хўжаобод, Пахтаобод, Қўрғонтепа, Избоскан туманларида қудуқлар бурғилашга мораторий жорий этилди.
Шунингдек, 4 ёшдан 14 ёшгача бўлган болаларга мўлжалланган ўзбек (“Томчивой”) ва рус (“Капелка”) тилларида журнал тайёрланиб, чоп этилган. Умумтаълим мактабларида очиқ дарслар, жумладан Water тиме дастури ташкил этилган. Бугунги кунга қадар мазкур дастурнинг 4 та сони тасвирга олиниб, оммага эълон қилинган.
Ўзбекистон дунёдаги энг қурғоқчил мамлакатлардан биридир. Ҳудуднинг катта қисми чўл зонасида жойлашган, мамлакатдаги дарё ва кўллар йирик халқаро сув омборлари билан боғланган бўлиб, улардан бошқа мамлакатлар ҳам фойдаланади.
Июнь ойида одамларнинг ерости сувларига бўлган чексиз чанқоғи шунчалик ошдики, бу Ер ўқининг силжишига сабаб бўлгани тўғрисида хабар берилганди.
Изоҳ (0)