UzAuto Motors AJ Chevrolet Captiva-5 avtomobilini yetkazib berish bo‘yicha bekor qilingan shartnomalarning mablag‘larini qaytarishi va kompensatsiya to‘lanishini ma’lum qildi.
Noyabr oyi o‘rtalarida ijtimoiy tarmoqlarda Chevrolet Captiva-5 avtomobili uchun to‘lov qilgan xaridorlar avtosalonlar va UzAuto Motors mas’ullari bilan bog‘lanib, ularga mashina go‘yoki “mintaqamizga to‘g‘ri kelmagani uchun” yetkazib berilmasligi, to‘lovni yo butunligicha qaytarib olish yoki boshqa model xaridi uchun yo‘naltirish tavsiya etilayotgani haqida xabarlar tarqalgan edi. Oradan salkam bir hafta o‘tib, UzAuto Motors kompaniyasi Captiva-5 bo‘yicha shartnomalar tuzishni to‘xtatishga “majbur bo‘layotgani”ni e’lon qildi.
O‘shanda mijozlar murojaatidan keyin 3 kun ichida tuzilgan shartnomalar bo‘yicha to‘langan barcha mablag‘lar to‘liq qaytarilishi, shuningdek, kompaniya qo‘shimcha ravishda oldindan to‘lov summasining 5 foizini kompensatsiya sifatida taqdim etilishi ma’lum qilgandi.
UzAuto Motors’ning ma’lum qilishicha, Chevrolet Captiva-5 avtomobili bo‘yicha jami 461 ta shartnoma puli to‘langan. Ayni paytda 207 nafar xaridor Chevrolet Captiva-5 avtomobili o‘rniga boshqa avtomobilni olishga qaror qilgan, 161 nafari esa to‘langan mablag‘ni qaytarilishi uchun ariza bilan murojaat qilgan va allaqachon pullarini qaytarib olgan. 41 nafar mijoz kechagi kundan boshlab kompensatsiya sifatida taqdim etilgan 5 foizlik to‘lov summasini olgan.
Ta’kidlanishicha, qolgan xaridorlar ham o‘z mablag‘lari va kompensatsiyani yaqin ikki-uch kun ichida oladi.
Ma’lumot uchun, Captiva modeli O‘zbekiston bozoriga 2007-yilda kirib kelgan. O‘sha yilning oktabrida mamlakatda avtomobilni yig‘ish yo‘lga qo‘yilgan. 2011-yilning sentabri va 2017-yilning fevralida model yangilangan. 2018-yilning sentabrida esa GM’ning global strategiyasiga muvofiq uni ishlab chiqarish to‘xtatilgan.
Izoh (0)