Ички ишлар вазири генерал-лейтенант Пўлат Бобожонов Ўзбекистон аҳолисига мурожаат билан чиқди. Мурожаат матни “Янги Ўзбекистон” нашри томонидан эълон қилинди.
Бобожоновга кўра, ички ишлар органларини ислоҳ қилиш жараёнларида жиноятчиликка қарши курашиш, ижтимоий хавфли қилмишларни фош этиш ва барвақт олдини олиш борасидаги ёндашувлар тубдан ўзгартирилган.
Бугунги кунда ички ишлар тизимидаги ҳар бир раҳбар ва ходимнинг кундалик хизмат фаолиятида рақам ва фоизлар ортидан қувиш эмас, балки фуқароларнинг ҳақ-ҳуқуқларини амалда ҳимоя қилиш биринчи галдаги вазифага айланмоқда. Жиноятчиликни янгича услубда таҳлил этиш, ходимлар иш самарадорлигини уларнинг хизмат вазифасини қай даражада сифатли ва малакали бажаришига қараб баҳолаш механизми жорий этилгани иш сифати ва мазмунини тубдан яхшилаш имконини бермоқда.
Шу билан бирга, Бобожонов 28 июль куни Фарғона шаҳрида Ички ишлар вазирлиги ҳайъатининг Шавкат Мирзиёев раислигида бўлиб ўтган кенгайтирилган йиғилишида тизимдаги ишлар чуқур таҳлил қилиниб, ҳал этилиши лозим бўлган масалалар аниқ кўрсатиб берилганини қайд этган.
Шулардан келиб чиқиб, мавжуд муаммоларга ечим топиш, аҳоли учун хавфсиз яшаш ва меҳнат шароитларини яратиш борасида ички ишлар органлари томонидан қатор вазифалар белгилаб олинган.
“Аччиқ бўлса ҳам тан олиш керак: тўққиз ярим мингга яқин маҳалланинг 1,5 мингдан зиёдида криминоген вазият мураккаблигича қолмоқда. Таҳлиллар кўрсатмоқдаки, маҳалладаги жиноятчиликнинг илдизи кўпинча ижтимоий муаммоларга бориб тақалмоқда”, — дейди вазир.
Шунинг учун ҳуқуқбузарликларнинг олдини олиш бўйича “ижтимоий профилактика” тизимини тўғри йўлга қўйиш орқали профилактика инспектори, маҳалла раиси, ҳоким ёрдамчиси, ёшлар етакчиси, хотин-қизлар фаолидан иборат “маҳалла бешлиги” ҳамкорлиги янада кучайтирилиши қайд этилган.
Бундан ташқари Пўлат Бобожоновнинг сўзларига кўра, тизимда маънавий-ахлоқий масалаларга эътибор тубдан ўзгаради. Ички ишлар органлари ходимлари ҳар куни минглаб фуқаро билан мулоқотга киришади. Бу жараёнда уларнинг хушмуомала бўлиши, фуқаролар муаммоларига қонуний ечим топиши аҳоли, умуман, жамиятдаги ижтимоий кайфиятга жуда катта таъсир кўрсатади.
“Бундан буён ҳам кадрларни тайёрлаш, танлаш ва жой-жойига қўйиш ҳамда тизимни нопок, ғаразли ниятдаги, ўз манфаатларини халқ манфаатидан устун қўядиган шахслардан тозалаш ишлари диққатимиз марказида бўлади”, — дейди ИИВ раҳбари.
Май ойида собиқ ички ишлар ходими, Тошкент шаҳрида ЙПХ мансабдори лавозимида ишлаган фуқаро ички ишлар вазири Пўлат Бобожонов қабулида бўлиб, лавозимидан ноҳақ олинганини, унга нисбатан ўтказилган хизмат текшируви адолатсиз бўлганини айтиб, кўмак сўрагани тўғрисида хабар берилганди.
Изоҳ (0)