Озарбайжон Туркманистон газини Эрон орқали сотиб олиш ҳажмини бир ярим баробардан кўпроққа оширди, деди Эроннинг Ашхободдаги элчиси Ғулом Аббос Арбоб Холес.
“Туркман газини Эрон ҳудуди орқали етказиб беришга келсак, шартномаларимизни кўриб чиқишимиз керак. Лекин келишувларга кўра, Озарбайжонга кунига 4,5–5 миллион куб метр етказиб берамиз. Ҳозир айирбошлаш ҳажми 7–7,5 миллион куб метргача оширилди”, — дея дипломатнинг сўзларидан иқтибос келтиради “ТАСС” агентлиги.
Унинг сўзларига кўра, ушбу йўналишда айирбошлаш салоҳияти кунига 20 миллион куб метр газни ташкил этади.
Маҳаллий мутахассисларнинг “Дарё”га маълум қилишича, газ етказиб бериш 2022 йилда уч томонлама келишув асосида бошланган. Очиқ шартномага кўра, Эрон Озарбайжоннинг Астара шаҳрига етказиб бериши учун Туркманистоннинг Серахс шаҳридан йилига 3,0–4,0 миллиард куб метргача бўлган ҳажмда газ олиши мумкин.
Ушбу транзит хизматлари Эроннинг миллий газ ресурсларидан узоқда жойлашган Резавий, Шимолий ва Жанубий Хуросон, Гулистон ва Семнан каби вилоятларини табиий газ билан таъминлашга ёрдам беради.
Эзиз Бояров
Изоҳ (0)