Суриядаги террорчилар сафига қўшилган андижонлик эркак 10 йил 1 ой муддатга озодликдан маҳрум этилди. Унинг акаси қуролли тўқнашувларда ҳалок бўлган.
ЎзАнинг маълум қилишича, Андижон шаҳрида яшовчи, 1997 йилда туғилган шахс 2017 йилнинг июнида ишлаш мақсадида Туркиянинг Истанбул шаҳрига бориб, савдо дўконида сотувчилик билан шуғулланади. Орадан бир йил ўтиб, унинг олдига акаси боргач, улар бирга ишлай бошлайди.
Лекин, диний мутаассибликка берилган, 1995 йилда туғилган ака ўз укасини тўғри йўлдан адаштириб, унга террористик ташкилотлар ва диний экстремистик оқимларнинг ғоявий раҳнамолари бўлган Содиқ Самарқандий, Абдуллоҳ Зуфар, Абдуллоҳ Бухорийларнинг маърузаларини тарғиб қилади ҳамда Сурия давлатига бориб, жиҳод қилиш лозимлигини айтади.
2018 йилнинг куз ойларида ака-укаларнинг каттаси, кейинроқ эса кичиги Сурия давлатидаги террористик ташкилот сафига бориб қўшилади, бироқ қуролли тўқнашувлар вақтида уларнинг каттаси ҳалок бўлади. Бу вақтда эндигина жанговар тайёргарликдан ўтиб бўлган ука ўз акасининг жасадини топиб қабрга қўяди.
Ўша пайтлари террористик ташкилотлар ўртасида юзага келган келишмовчиликлар, амир бўлиш учун етакчиларнинг ўзаро низоларга киришишларини кўриб, ҳафсаласи пир бўлган андижонлик йигит онаси юборган пуллар ёрдамида Туркияга қайтиб ўтади.
Кейинроқ бир муддат Қирғизистонда бўлиб, сўнгра Қозоғистонга борган ва ушбу давлатнинг сохта фуқаролик паспортини олган мазкур шахс ҳужжатни қалбакилаштиргани учун ҳуқуқ-тартибот идоралари томонидан ушланиб, жиноий жавобгарликка тортилади. У жазо муддатини ўтаб бўлгач, Ўзбекистонга депортация қилинади.
Жиноят ишлари бўйича Андижон шаҳар судининг ҳукмига кўра, “Тавҳид ва жиҳод катибаси” террористик ташкилоти фаолиятида иштирок этган ушбу фуқаро Жиноят кодексининг 155-2 ва 244-2-моддалари билан айбли деб топилиб, унга нисбатан 10 йил 1 ой муддатга озодликдан маҳрум этиш жазоси тайинланди.
Изоҳ (0)