Москва мэри Сергей Собянин 5 сентябрга ўтар кечаси ҳаво ҳужумидан мудофаа кучлари пойтахтга ҳужум уюштирмоқчи бўлган дронларни йўқ қилганини айтди.
Дронлар Калуга вилоятида, Тверь вилоятининг Завидово қишлоғи яқинида, шунингдек, Москва вилоятининг Истра туманида уриб туширилган.
Собяниннинг сўзларига кўра, Москва вилоятида дрон бўлакларининг қулаши оқибатида “маиший иншоот” шикастланган. Москва мэри гап қайси объект ҳақида кетаётганига аниқлик киритмади.
Ўз навбатида, Россия Мудофаа вазирлиги “Киев режими” учта дрон ёрдамида “террорчилик ҳужуми” уюштиришга уринганини маълум қилди. Улардан бири Калуга вилоятида, иккинчиси Москва вилоятида уриб туширилди, учинчиси Тверь вилоятида “тўхтатиб қолинди”, дейилади вазирлик хабарида.
Москванинг Внуково ва Шереметево аэропортларида тунги парвозлар чекланди, бешта самолёт муқобил аэропортларга йўл олди, деб хабар бермоқда “Росавиция”. Соат 07:30 дан бошлаб (Тошкент вақти билан 09:30) пойтахтнинг барча аэропортлари одатдагидек ишламоқда.
Собянин Москвага дронлар ҳужуми ҳақида охирги марта 1 сентябрь куни эрталаб хабар берганди. Унга кўра, дрон Москва вилоятида Люберци шаҳри яқинида уриб туширилган. Украина Мудофаа вазирлигининг Бош разведка бошқармаси Люберци шаҳрида дрон ҳужумидан сўнг Томилинский электрон заводида ёнғин чиққанини даъво қилди. Ушбу маълумот тасдиқланмаган.
Изоҳ (0)