Москва мери Сергей Собяниннинг айтишича, 18 августга ўтар кечаси ҳаво ҳужумидан мудофаа кучлари шаҳарга учиб келаётган дронни уриб туширган.
“Дрон қолдиқлари Экспомарказ зонасига тушди, бинога жиддий зарар етмади. Жабрланганлар йўқ”, — деб ёзди Собянин ўзининг Telegram каналида.
Ўз навбатида, Россия Мудофаа вазирлиги эрталаб соат тўрт атрофида Украина Москва ва Подмоскведаги объектларда дрон ёрдамида “яна бир терактни” амалга оширишга уринганини маълум қилди.
“Дрон ҳаво ҳужумидан мудофаа қуроллари таъсири билан парвоз йўналишини ўзгартириб, Москвадаги Краснопресненская соҳил ҳудудида нотураржой биносига қулаб тушди. Жабрланганлар ва ёнғин ҳолатлари йўқ”, — деб хабар қилди Россия Мудофаа вазирлиги.
Шу билан бирга, гувоҳлар олган видеоларда воқеа жойидан тутун кўтарилгани кўринади. База Telegram каналининг дастлабки маълумотларга кўра, дрон Экспомарказнинг саккизинчи павильонида 30 квадрат метр майдонга қулаган. Mash’нинг ёзишича, павильон томи шикастланган. Қурбонлар ҳақида маълумот берилмаган.
18 август куни эрталаб дрон ҳужуми туфайли расмийлар Москванинг барча тўртта аэропортида: Внуково, Домодедово, Шереметево ва Жуковскийда самолётлар парвозини вақтинча чеклади, деб маълум қилди Федерал ҳаво транспорти агентлиги. Соат 4:30 да (Тошкент вақти билан 6:30) барча чекловлар олиб ташланган.
Россиянинг Украинага кенг кўламли босқини бошланганидан бери Москва бир неча бор дронлар ҳужумига учради. 1 августга ўтар кечаси “Москва Сити” минораларига учувчисиз учоқлар келиб тушган эди.
Изоҳ (0)