Украина дрони Москвага ҳужум қилишга урингани айтилди

Москва мери Сергей Собянин шаҳарга дрон ҳужум қилишга урингани ва у уриб туширилганини маълум қилди. 

Сергей Собяниннинг сўзларига кўра, бу “душманнинг дрони” бўлган. 

“Тунда душманнинг дрони шаҳарга ҳужум қилишга уринди, у Россия Мудофаа вазирлиги кучлари томонидан уриб туширилди”, — дейди пойтахт мери.

Амалдор ҳодиса оқибатида ҳеч ким жабрланмаганини, вайронагарчиликлар бўлмаганини қўшимча қилди. Собянин воқеанинг бошқа тафсилотлари ҳақида маълумот бермади.

Кейинроқ Россия Мудофаа вазирлиги ҳаво ҳужумидан мудофаа кучлари “Москва вилоятидаги нишонларга ҳужум қилмоқчи бўлган” дронни уриб туширганини маълум қилди.

Москвага сўнгги дрон ҳужуми

24 июлга ўтар кечаси Москвага иккита дрон ҳужум қилди. Дронлардан бири Россия Мудофаа вазирлиги биноси ёнида қулаган. Россия “Киев режими”ни терактга уринишда айблаган. РБК-Украина хабарига кўра, дрон ҳужумини Украина разведкаси уюштирган, бу Киевда расман тасдиқланмаган.