Шимолий Корея етакчиси Ким Чен Ин сентябрь ойида Россияга ташриф буюриб, Владимир Путин билан музокаралар ўтказиш ниятида, деб хабар бермоқда The New York Times газетаси АҚШ расмийларига таяниб.
Газета суҳбатдошларига кўра, КХДР ва Россия раҳбарлари 10—13 сентябрь кунлари Владивостокдаги Узоқ Шарқ федерал университети кампусида бўлиб ўтадиган Шарқий иқтисодий форумда иштирок этади.
Ким Чен Ин Пхеньян дан Россияга ўзининг зирҳли поездида келиши кутилмоқда. Манбалар Шимолий Корея етакчиси Москвага ҳам ташриф буюриши мумкинлигини истисно этмаган.
Музокаралар давомида томонлар КХДРдан артиллерия снарядлари ва танкка қарши ракеталарни етказиб бериш масаласини муҳокама қилишни режалаштирган. Ўз навбатида, Ким Чен Ин Россия Шимолий Кореяни озиқ-овқат ҳамда сунъий йўлдошлар ва ядровий сувости кемалари учун илғор технологиялар билан таъминлашига умид қилмоқда, дейди АҚШ расмийлари.
Америка разведкаси Россия ва Шимолий Корея Украинадаги урушда рус ҳарбийлари қўллайдиган қурол-яроғларни етказиб бериш бўйича фаол музокаралар олиб бораётгани ҳақида бир неча бор хабар берганди. Июль ойида Россия мудофаа вазири Сергей Шойгу Шимолий Кореяга расмий ташриф билан борди. АҚШ разведкаси ушбу сафарни музокараларга тайёргарлик сифатида баҳолади.
Изоҳ (0)