Россия Мудофаа вазирлигининг маълум қилишича, Украина ҳарбийлари самолёт типидаги дрон ёрдамида Москва ва Москва вилоятидаги нишонларга зарба беришга уринган.
Вазрилик хабарида айтилишича, ҳужум 26 август куни соат тахминан 3:00 да (Тошкент вақти билан 5:00) қайтарилган.
“Москва вилоятининг Истра тумани ҳудудида ҳаво ҳужумидан мудофаа хизмати томонидан учувчисиз учар аппарат йўқ қилинди”, — дейилади хабарда.
Мудофаа вазирлиги дрон ҳужуми оқибатида қурбонлар бор-йўқлигига аниқлик киритмаган. Москва мери Сергей Собяниннинг айтишича, дастлабки маълумотларга кўра, жабрланганлар ва вайроналар йўқ.
26 августга ўтар кечаси Москванинг Домодедово ва Внуково аэропортлари парвозларни тахминан бир соатга чеклаб қўйди, бироқ ҳозир одатдагидек ишламоқда, деб ёзади “РИА Новости” аэропортлар матбуот хизматига таяниб.
Сўнгги бир неча ҳафта ичида Москва ва Москва вилояти мунтазам равишда учувчисиз учоқлар ҳужумига учради. Хусусан, 21—22 август кунлари Москва вилоятида дронлар уриб туширилди, 18 августда эса Москва шаҳри яқинидаги нотурар жой биносига учувчисиз учоқ қулади.
23 августга ўтар кечаси ҳужумчи дрон “Москва Сити”гача келди ва ҳудуддаги қурилиши битмаган бинога урилди.
Изоҳ (0)