Грузия парламенти депутатлари мухолифатчи депутат Теона Акубардиянинг республикада фашизм устидан қозонилган Ғалаба кунини 9 майдан 8 майга кўчириш ҳақидаги қонунчилик ташаббусини биринчи ўқишда қўллаб-қувватламади.
Овоз бериш натижаларига кўра, Меҳнат кодексига ўзгартириш киритишни ёқлаб 20 нафар депутат овоз берди, 4 нафар депутат қарши чиқди.
Минбардан сўзга чиққан Акубардия фашизм устидан қозонилган Ғалаба кунини Россия билан эмас, Европа билан бир кунда нишонлаш зарурлигини айтиб ўтди. Унинг сўзларига кўра, қонун лойиҳаси фахрийлар ва бошқа шахсларга 9 май куни байрамни нишонлаш ва шу куни ёдгорликларни зиёрат қилишни тақиқламайди, бироқ расмий дам олиш куни 8 май куни бўлиши керак.
Ҳукмрон “Грузия орзуси – демократик Грузия” партияси депутатлари қонун лойиҳаси муҳокамаси чоғида ташаббускорга саволлар берар экан, қонун лойиҳаси 9 майни нишонлашга ўрганиб қолган жамиятни парчалашга хизмат қилишини таъкидлаб, уни танқид қилди.
Шунингдек, уларнинг фикрича, таслим бўлиш тўғрисидаги пакт имзоланган пайтда соат неча бўлганини муҳокама қилиш бемаъниликдир. Шу боисдан фашизм устидан қозонилган ғалаба кунини 9 май куни расман нишонлашда давом этиш зарур, дея таъкидлашди депутатлар.
Изоҳ (0)