Mercedes-Benz Special Trucks компанияси Украина Мудофаа вазирлигига 100 дан ортиқ Zetros йўлтанламас юк машиналарини етказиб берди, деб хабар берди Daimler Truck бош компанияси.
“Mercedes-Benz Special Trucks Украина Мудофаа вазирлигига 100 дан ортиқ Zetros йўлтанламас юк машинасини етказиб берди. Етказиб бериш таркибига ҳарбий ёрдам ва логистика вазифалари учун мўлжалланган бир неча турдаги автомобиллар киради”, — дейилади Daimler Truck компанияси баёнотида.
Қайд этилишича, юк машиналари етказиб берилишидан аввал ҳайдовчилар ушбу турдаги транспорт воситаларини бошқариш бўйича курсларда ўқитилган.
“Харид учун маблағ Германия Ташқи ишлар вазирлиги ва Германия мудофаа вазири томонидан биргаликда назорат қилинадиган ва амалга оширилаётган Германия ҳукуматининг қўллаб-қувватлаш ташаббуси доирасида олинган”, — дейилади хабарда.
Zetros юк машиналари 16,5 дан 40 тоннагача юк кўтариши мумкин.
Аввалроқ Россия Украинага қурол етказиб берилгани учун НАТО давлатларига нота юборган эди. Россия ташқи ишлар вазири Сергей Лавров Украина учун қурол бўлган ҳар қандай юк Россия учун қонуний нишонга айланишини таъкидлади. Россия Ташқи ишлар вазирлиги НАТО давлатлари Украинага қурол етказиб бериш орқали “ўт билан ўйнашмоқда”, деб таъкидлади.
Изоҳ (0)