“Ташаббусли бюджет”нинг 2023 йил иккинчи мавсумидаги лойиҳаларга овоз бериш 27 августдан бошланганди. Овоз бериш жараёнларининг дастлабки кунлари тизимда айрим техник муаммолар кузатилганига изоҳ берилди.
Иқтисодиёт ва молия вазирлиги ахборотига кўра, овоз беришда техник муаммолар кузатилаётгани бўйича фойдаланувчилар томонидан айрим эътирозлар билдирилди.
Ушбу ҳолат овозлар сонини сунъий равишда кўпайтириш мақсадида ишлаб чиқилган норасмий ботлар орқали овоз йиғиш, шунингдек, турли хил спам ва хакерлик ҳужумлари оқибатида юзага келди. Бу каби уринишларнинг олдини олиш учун қўйилган чекловлар натижасида ахборот порталида бир қатор узилишлар рўй берди.
“Ҳозирда барча зарурий техник чоралар кўрилиб, ахборот портали фаолияти мўътадиллаштирилганини маълум қиламиз” — дейилади хабарда.
Ушбу мавсум доирасида республика бўйлаб жами 49,5 мингта лойиҳа илгари сурилган. Ҳудудлар кесимида таҳлил қилинганда, Сурхондарё бўйича – 12,3 мингта, Тошкент шаҳрида 4,0 мингта, Қашқадарё вилоятида 3,6 мингта ва Фарғона вилоятида 3,4 мингта лойиҳа илгари сурилган.
Жорий мавсум учун туман (шаҳар) бюджетлари ҳисобидан жами 1 триллион сўмдан ортиқ маблағлар йўналтирилиши кутилмоқда.
Овоз бериш жараёнлари 16 сентябргача давом этади.
Изоҳ (0)