Ўзбекистонда биноларни қуриш ва капитал таъмирлаш тақиқланган ҳудудларда буни амалга оширганлик учун маъмурий ва жиноий жавобгарлик кучайтирилади. Бу ҳақда сейсмик хавфсизликни таъминлаш тизими такомиллаштирилгани муносабати билан Жиноят кодекси ва Маъмурий жавобгарлик тўғрисидаги кодексга қўшимча ва ўзгартиришлар киритиш ҳақида қонун лойиҳасида белгиланди.
Унда қайд этилишича, сўнгги вақтларда хорижий мамлакатларда содир бўлаётган кучли зилзилалар оқибатида юзага келаётган турли хил талафотлар мамлакатда сейсмик хавфсизликни таъминлаш, бино ва иншоотларнинг зилзилабардошлигини оширишга қаратилган бир қатор манзилли чора-тадбирларни амалиётга татбиқ этишни талаб этмоқда.
Хусусан, республикада барпо этилаётган ва қайта таъмирланаётган бино ва иншоотларнинг зилзилабардошлигини оширишда мазкур бино ва иншоотларни барпо этаётган ва таъмирлаётган ташкилотларнинг масъулиятини ошириш, шаҳарсозлик қонунчилигида белгиланган талабларга қатъий риоя этиш борасида назорат қилишни кучайтириш зарурати юзага келмоқда.
Шу муносабат билан Жиноят кодекси 229-3-моддаси (белгиланган тақиқларни (чекловларни) бузган ҳолда биноларни, иншоотларни ёки бошқа объектларни қуриш, реконструкция қилиш ва капитал таъмирлаш) биринчи қисмининг санкцияси қуйидагича ўзгартирилмоқда:
“базавий ҳисоблаш миқдорининг 150 бараваридан 300 бараваригача (49,5 миллион сўмдан 99 миллион сўмгача) миқдорда жарима ёки 360 соатгача мажбурий жамоат ишлари ёхуд 3 йилгача ахлоқ тузатиш ишлари ёки 1 йилдан 3 йилгача озодликни чеклаш ёки 1 йилдан 3 йилгача озодликдан маҳрум қилиш билан жазоланади”.
Амалда бу ҳаракатлар учун БҲМнинг 30 бараваридан 50 бараваригача (9,9 миллион сўмдан 16,5 миллион сўмгача) жарима ёки 360 соатгача мажбурий жамоат ишлари ёхуд 3 йилгача ахлоқ тузатиш ишлари билан жазоланади.
Шунингдек, Маъмурий жавобгарлик тўғрисидаги кодекснинг 99-моддаси (Шаҳарсозлик тўғрисидаги қонунчиликни бузиш) қуйидаги мазмундаги иккинчи қисм билан тўлдирилмоқда:
“Шаҳарсозлик ҳужжатларини ишлаб чиқувчиларнинг буюртмачига қурилиш-монтаж ишларини шаҳарсозлик ҳужжатларига мувофиқ амалга ошириш бўйича бериладиган ёзма кўрсатмаларини буюртмачи томонидан бажаришдан бўйин товлаш ёки ўз вақтида бажармаслик — фуқароларга базавий ҳисоблаш миқдорининг 5 бараваридан 10 бараваригача (1 миллион 650 минг сўмдан 3,3 миллион сўмгача) , мансабдор шахсларга эса — 10 бараваридан 20 бараваригача (3,3 миллион сўмдан 6,6 миллион сўмгача) миқдорда жарима солишга сабаб бўлади”.
Ҳужжатда қайд этилишича, ушбу қонун шаҳарсозлик тўғрисидаги қонунчиликка мувофиқ биноларни, иншоотларни қуришга ва капитал таъмирлашга тақиқлар белгиланган ҳудудларда шундай ишларни амалга оширганлик учун маъмурий ва жиноий жавобгарликни кучайтиради, шунингдек, лойиҳа ташкилотининг лойиҳага мувофиқ ижро этилиши мажбурий бўлган кўрсатмаларни бажармаганлик учун жавобгарликни белгилайди ва қурилиш соҳасида шаҳарсозлик қонунчилигига қатъий риоя этилишига хизмат қилади.
Изоҳ (0)