Ички ишлар вазирлиги биносида ТҚД Жиноят қидирув хизмати Одам савдосига қарши курашиш бўлими ва АҚШ Халқаро ривожланиш агентлигининг (USAID) ҳамда Winrock International халқаро қишлоқ хўжалигини ривожлантириш институти вакиллари ўртасида халқаро ишчи учрашуви бўлиб ўтди. Бу ҳақда вазирлик матбуот хизмати хабар берди.
Маълум қилинишича, учрашувда USAID томонидан Ички ишлар вазирлиги ва унинг ҳудудий бўлинмаларига умумий қиймати қарийб 50 минг доллар миқдоридаги офис жиҳозлари (компьютерлар, ноутбуклар, принтерлар, проектор ва девор экранлари) одам савдоси соҳасидаги жиноятлар тўғрисидаги маълумотларнинг ягона марказлаштирилган ахборот базасининг самарали фаолият юритишини таъминлаш мақсадида тақдим этилган.
Ягона марказлаштирилган ахборот базасига одам савдоси жабрдийдаларига кўрсатилаётган ёрдам хизматлари тўғрисидаги маълумотлар ҳам киритилади. Ушбу маълумотлар қўллаб-қувватлаш хизматларидаги камчиликларни аниқлашга ва одам савдоси жабрдийдалари учун хизматларни яхшилаш бўйича далилларга асосланган тавсияларни ишлаб чиқишга ёрдам беради.
Ушбу ёрдам Winrock International халқаро қишлоқ хўжалигини ривожлантириш институти филиали томонидан амалга оширилаётган “Марказий Осиёда хавфсиз миграция” (SMICА) лойиҳаси доирасида тақдим этилган.
Бундан олдин USAID’нинг Ўзбекистондаги миссиясига янги раҳбар тайинлангани, USAID Тошкентда экологик ғоялар бўйича талабалар танлови ғолибларини тақдирлагани, АҚШ халқаро тараққиёт агентлиги Ўзбекистонга 131 тонна озиқ-овқат ёрдами етказиб бергани маълум қилинганди.
Изоҳ (0)