“Бензинни арзон сотганимиз учун камомад юзага келди”—“Ўзбекнефтгаз” раиси Аи–92 бензини нархи нега ўйнаётганини изоҳлади

Март ойида чегирма эълон қилиниб, UNG Petro заправкаларидаги Аи-92 бензинининг нархи 9200 сўмдан 7 500 сўмга туширилганди. Август ойи ўртасидан мазкур маркали бензин яна 9200 сўмдан сотилмоқда. ОАВ вакиллари учун Қашқадарёга уюштирилган пресс–турда “Ўзбекнефтгаз” раиси Баҳодир Сиддиқов нарх ўйнаши билан боғлиқ вазиятни изоҳлади, дея хабар берди “Дарё” мухбири.

Баҳодир Сиддиқовнинг айтишича, бензин сотиш жараёнида бозор механизмлари ишламоқда.

“Бу давлат бошқарувидаги масала эмас. Ҳар битта етказиб берувчи бозор шароитидан келиб чиқиб маҳсулот нархини белгилайди. Март ойида Аи –92 бензини учун эълон қилинган акция иқтисодий самарадорликдан келиб чиқилганди. Қиш ўта совуқ келди. Ўша пайтда жуда катта миқдорда бензин импорт қилинган. Импорт турган маҳсулотларни нақд пулга айлантириш мақсадида бу акция эълон қилинган. Акциямиз айрим сабабларга кўра чўзилиб кетди. Ҳозир уни тўхтатганмиз.

Бу бозор. Бугун брент нефтининг нархи ошиб кетди. Шунга қараб бозор ўйнаб туриши керак. Бу бозорни ўйнаганидан ҳаммамиз ютамиз. Масалан, агар биз бензин нархини сунъий равишда паст ушлаб турсак, бу эртами-кечми етишмовчилик келтириб чиқаради. Оддий мисол, Аи–92 бензини нархини паст ҳолатда ушлаб турганимизда бизга жуда кўп эътирозлар келди. Чунки бошқа заправкалар 9 500 сўм сотаётган бензинни биз акция қилиб 7 500 сўмдан сотдик. Бензиннинг нархини пасайтириш ҳисобига маҳсулотимизда камомад юзага келишни бошлади. Яъни биз етказиб беришни эплай олмай қолдик. Бу эртами кечми барибир дефицитга олиб келади. Шунинг учун бозор шароитларидан келиб чиқиб сотишга қарор қилдик”, — деди компания раҳбари.

Баҳодир Сиддиқовнинг қўшимча қилишича, республикада мавжуд 2500–3000 та заправкадан 69 таси “Ўзбекнефтгаз”га қарашли. Мазкур АЁҚШлар кўпчилик ўйлаганидек катта фойда келтирмайди.

“Булар пулни тагида қолиб ётипти”, дейдиганлар учун бензиннинг таннархи ҳақида гапириб бераман. Бизда заправкалар билан шуғулланадиган иккита корхона бор. Биттасини Татаристоннинг Татнефть компанияси билан тузганмиз. У билан Тошкент шаҳрида 1 та газ шохобчамиз бор. Ва UNG Petro да 69 та заправкамиз мавжуд. 2022 йилда Татнефть билан заправкамиздан 8 миллиард сўм дивидент олдик. Бу жами даромаднинг ярми. Чунки у заправканинг ярим улушига эгалик қиламиз. Қолган 69 та заправкадан ҳам 8 миллиард сўм даромад олдик. Яъни ўтган йили 69 та запракадан 100 фоизли улушимиз билан 8 миллиард сўм фойда олган бўлсак, нариги 1 та заправканинг 50 фоиз улуши билан ҳам 8 миллиард сўм фойда олинди. Шунинг учун бизни монопол ташкилот, деб айблашлари менга жуда ҳам оғир ботади. Биз ижтимоий мажбуриятимизни ҳис қиламиз. Биз доим фойда олишга эътибор қаратмаймиз. Аҳолини сифатли нефть маҳсулотлари билан таъминлаш бизнинг ижтимоий вазифамиз. Бундан кейин ҳам вазифамизни бажарамиз”, — деди “Ўзбекнефтгаз” раиси.

Аввалроқ “Ўзбекнефтгаз” АЖ департаменти бошлиғи Жамшид Багиров “Дарё” мухбирига берган интервьюсида Ўзбекистонда бензинга талабнинг кескин ошиши ва нархлар кўтарилиши мумкинлигини инобатга олиб, қатор чоралар кўрилганини айтганди.