Москва мэри Сергей Собянин 6 август куни эрталаб шаҳарга дрон ҳужум қилишга уринганини маълум қилди.
“Бугун соат 11:00 лар атрофида дроннинг Москвага киришга уриниши қайд этилди. У парвоз пайти Ҳаво ҳужумидан мудофаа кучлари томонидан йўқ қилинди”, — деган Собянин ўзининг Telegram каналида.
Россия Мудофаа вазирлиги дроннинг йўқ қилинганини тасдиқлаган. Вазирлик баёнотида “Украина Қуролли кучлари дрон ёрдамида Москва вилоятидаги объектларга ҳужум қилмоқчи бўлгани” айтилган.
“Дрон Подолск шаҳридаги ҳаво ҳужумидан мудофаа тизимлари томонидан йўқ қилинган. Қурбонлар ва вайроналар йўқ”, — дейди Мудофаа вазирлиги.
Мазкур баёнотдан аввалроқ Москванинг Внуково аэропорти ҳаво зонаси вақтинча ёпилган ва самолётларни қабул қилиш ва қўйиб юборишга чекловлар ўрнатилган.
“База” онлайн нашри дрон парчалари оқибатида 77 ёшли эркак қўлидан жароҳат олганини хабар қилган. Бироқ бошқа манбалар буни ҳали тасдиқламаган.
Нашрнинг иддао қилишича, дрон парчалари Селхозтехника қишлоғидаги Садовая кўчасидаги болалар майдончасига қулаб тушган. Гап Украинанинг UJ-22 Airborne дрони ҳақида кетаётгани айтилган. Уриб туширилган дрон қолдиқлари акс этган сурат тармоқларда тарқалган.
Москвага дронлар ҳужуми: вазият қандай?
1 августга ўтар кечаси Москвага яна дронлар ҳужум қилди. Улардан иккитаси шаҳарга яқинлашганида ҳаво мудофааси томонидан уриб туширилди. Учинчиси аввалги ҳужумда шикастланган “Москва Сити” бизнес марказидаги бинога келиб урилди.
Аввалги ҳужум 30 июлга ўтар кечаси юз берганди. Жумладан, Москвага учта дрон учирилган, иккитаси “Москва Сити” бизнес марказидаги биноларга келиб тушган. Дронларнинг яна бири Москва вилоятининг Одинсово туманида уриб туширилгани айтилган.
Бундан ташқари, 24 июль куни ҳам дрон ҳужуми бўлганди. Ўшанда Москвадаги нотурар жой бинолар зарар кўрган. Улардан бири Россия Мудофаа вазирлиги яқинида қулаган.
Май ойи охири ва июль бошида эса дронлар Россия пойтахтига яқинлашганда уриб туширилган. БМТ сўнгги дрон ҳужумини қоралаб, фуқаролик объектларига ҳужум қилмасликка чақирган.
Изоҳ (0)