АҚШ собиқ президенти Дональд Трамп расман ҳибсга олиниб, қамоқхонадан сурати эълон қилингач, унинг рейтинги ўсди. Reuters ва Ипсос сўровига кўра, Трамп Республикачилар партиясидан президентликка номзод бўлиш учун ўз устунлигини оширмоқда.
Собиқ президент Жоржия штатида ҳибсга олиниб, гаров эвазига қўйиб юборилганидан сўнг республикачиларнинг 52 фоизи уни президентликка номзод сифатида маъқуллашини айтган. Август ойи бошида Трамп рейтинги 47 фоизни ташкил қилаётганди.
Республикачилардан яна бир номзод Рон ДеСантис 13 фоиз партиядошларнинг қўллаб-қувватлови билан рейтингда иккинчи ўринда.
Reuters президент Жо Байден ва Трамп ўртасидаги фаразий қарама-қаршиликни солиштирди: Трампда қўллаб-қувватлов 38 фоиз, Байденда — 32 фоиз. Сўровномада иштирок этган бошқа респондентлар кимга овоз бериш ҳақида қарор қилмаганини айтишган.
Эслатиб ўтамиз, 23 август куни Трамп Жоржия штатининг Фултон округи қамоқхонасида штатда 2020 йилги президентлик сайлови натижаларини бекор қилишга уриниш билан боғлиқ ўндан ортиқ айбловлар бўйича расман полицияга таслим бўлди.
Трамп ҳужжатбозлик учун 20 дақиқадан кўпроқ вақтни қамоқда ўтказди ва 200 минг доллар гаров эвазига қўйиб юборилди. Полиция унинг бармоқ изларини, суратини ва бошқа маълумотларни олиб қолди.
Изоҳ (0)