23 август куни Евгений Пригожиннинг шахсий самолёти Тверь вилоятида ҳалокатга учради. Бортдаги 10 кишининг барчаси ҳалок бўлди. Федерал авиатранспорт агентлиги томонидан эълон қилинган йўловчилар рўйхатида “Вагнер” хусусий ҳарбий компанияси раҳбарининг исми бор. Аммо Пригожиннинг ўлими ҳали расман тасдиқланмаган. Бортда, рўйхатга кўра, “Вагнер” командири Дмитрий Уткин ҳам бўлган. BBC рус хизмати ва “Досье” маркази ҳалокатга учраган самолёт бортида бўлган яна саккиз киши ҳақида маълумот тўплади. Meduza ушбу маълумотларни тақдим этди.
Валерий Чекалов
Чекалов Санкт-Петербургда Пригожин билан боғлиқ компанияларни бошқарган. BBC рус хизматига кўра, Чекаловнинг танишлари унинг телефон рақамини “Валерий Евгениевич Сурия”, “Валерий Чекалов келишув армияси”, “Пригожиндан Валерий Евгениевич Чекалов” деб сақлаб қўйишган. 2011 йилдан 2018 йилгача Чекалов “Коллектив-Сервис” компаниясини бошқарган. 2012 йилда у Россия Мудофаа вазирлигининг “Воэнторг” компанияси билан тузилган шартнома асосида армия учун озиқ-овқат етказиб бериш бўйича пудрат олган. Шу билан бирга, у Қора денгиз флоти жойлашган Севастополдаги ҳарбий ошхонани рўйхатдан ўтказган.
Чекалов 2014 йилда ташкил этилган “Нева” компаниясини бошқарган, унинг шўба корхонаси “Европолис” эди. “Фонтанка” ёзганидек, 2016 йил декабрь ойида “Европолис” Сурия билан меморандум имзолаган. Унга мувофиқ компания беш йил ичида мамлакатдаги нефть иншоотларини қайтариб олиши ва уларни ҳимоя қилиши керак эди. Бунинг учун унга нефть ва газнинг 25 фоизи бериларди.
Евгений Макарян
Магнитогорскда туғилган, собиқ туман полицияси ходими. “Досье” маркази ёзишича, Макарян “Вагнер” ХҲКга 2016 йил март ойида қўшилган. У Суриядаги “вагнерчи”ларнинг тўртинчи ҳужум отряди таркибида хизмат қилган ва у ерда яраланган. BBC уни Пригожиннинг қўриқчиси деб атайди.
Сергей Пропустин
Пропустин “Тинчликпарвар” маълумотлар базасига киритилган, унда Пропустин разведкачи-гранатачи ҳамда “Вагнер” жангчиси деб аталган. “Досье” маълумотларига кўра, у иккинчи Чечен урушида қатнашган. Пропустин “Вагнер”га 2015 йил март ойида қўшилган, иккинчи разведка ва ҳужум отряди таркибида жанг қилган, кейинчалик ушбу отряддан кўплаб аскарлар Пригожиннинг шахсий қўриқчиси сифатида ёлланган. BBC уни ҳам “Вагнер” раҳбарининг қўриқчиси деб атайди.
Александр Тотмин
Тотмин ҳам “Тинчликпарвар” рўйхатида бор. Унинг Пригожин қўлида қайси йили иш бошлагани номаълум, аммо 2022 йилда у Санкт-Петербургда яшаган. Дўстлари унинг рақамини “ХҲКда ишлайдиган Sanyа”, “Тотмин Sanyа Питердаги идора” ва “Александер W” деб сақлаб қўйишган. 2012 йил август ойида Олтой ўлкаси суди унга бировнинг мулкида жойлашган ҳаммомдан электр арра ўғирлагани учун 300 соатлик мажбурий иш тайинлаган, 2014 йил сентябрда эса у машина ўғирлагани учун икки йиллик шартли қамоқ жазосига ҳукм қилинган.
Николай Матусеев
“Досье” маркази ушбу шахс 2017 йил январидан бери “Вагнер”да хизмат қилган Николай Матусевич эканини тахмин қилмоқда. У Суриядаги тўртинчи ҳужум отрядида ўт очувчи бўлган.
Рустам Каримов
29 ёш, иккинчи учувчи, рафиқаси билан Пермда яшаган. 2014 йилда Рязань вилоятидаги Сасово авиация мактабини тамомлаган. Каримовнинг отаси айтишича, Украинада кенг кўламли уруш бошланганидан сўнг ўғли ишсиз қолган, у ҳалокатга учраган самолётга эгалик қилувчи “МНТ-Аэро” компаниясига уч ой олдин ишга кирган, шундан сўнг Санкт-Петербургга кўчиб ўтган.
Алексей Левшин
Самолёт командири. Унинг қизи Анастасия “РБК”га Левшин Пригожин билан узоқ йиллардан бери ишлаб келганини айтди, аммо қандай иш экани ҳақида батафсил маълумот бермади. BBC ёзишича, 2018 йилда Левшин “Вести Новосибирск” телеканалида берилган сюжет қаҳрамони бўлган, сюжетда у Су-34 экипажининг навигатори деб аталади.
Кристина Распопова
39 ёшли стюардесса Қозоғистонда туғилган. “74.ру” нашрининг ёзишича, Распопованинг укаси Челябинск вилояти Еманжелинск шаҳри прокурори ўринбосари. Распопова Москва молия-юридик университетида ўқиган, бир муддат Екатеринбургда яшаган, кейин Москвага кўчиб ўтган. База ёзишича, “МНТ-Аэро”га ишга кирганидан кейин Распопова Москвадан Санкт-Петербургга кўчиб ўтган. Ижтимоий тармоқларга қараганда, аёл тез-тез саёҳат қилган, у Ямайка, Сингапур, Австрия ва бошқа мамлакатлардан фотосуратларини жойлаган. Илгари Распопова Пригожиннинг самолётига ўхшаш бизнес-жетда учган. База ёзишича, Пригожин самолёти учишидан бир неча соат олдин қиз оиласига негадир уларнинг парвози кечиктирилганини айтган.
Изоҳ (0)