1 августга ўтар кечаси Москвага яна дронлар ҳужум қилди. Улардан иккитаси шаҳарга яқинлашганида ҳаво мудофааси томонидан уриб туширилди. Учинчиси аввалги ҳужумда шикастланган “Москва Сити” бизнес марказидаги бинога келиб урилди.
Бизнес марказнинг ҳукумат идоралари жойлашган IQ кварталидаги бино шикастланган. Ҳеч ким жабрланмаган, деб ишонтирмоқда Москва мэрияси. Воқеа жойидан олинган фотосуратлар ҳам бинога жиддий зарар етмаганини кўрсатади.
Россия Мудофаа вазирлиги маълумотларига кўра, жами учта дрон ҳужум қилган. Иккита дрон Москва вилоятининг Одинцово ва Наро-фоминск туманларида ҳаво ҳужумидан мудофаа тизимлари ёрдамида уриб туширилган. Учинчи дрон радиоэлектрон уриш қурилмаси ёрдамида бостирилганидан сўнг “Москва Сити”га қулаган.
Оқ уй Миллий хавфсизлик кенгашининг стратегик алоқалар бўйича координатори Жон Кирби Москвага кетма-кет уюштирилаётган дронлар ҳужумига изоҳ берди. У АҚШ бундай зарбаларни рағбатлантирмаслигини таъкидлади.
“Шуни аниқ қилиб айтмоқчиманки, биз бундай зарбаларни рағбатлантирмаймиз ёки уларга ёрдам бермаймиз”, — деди Кирби CNN’га.
Оқ уй бундай зарбаларга тўсқинлик қиладими, деган саволга жавобан, Кирби АҚШ ҳукумати уларни рағбатлантирмаслиги ёки уларга ёрдам бермаслигини такрорлади. Унинг сўзларига кўра, Вашингтон Киев билан “Россия ичига берилаётган зарбалар юзасидан хавотирларни” муҳокама қилган, бироқ украиналиклар “нишонни танлашга ва ўз ҳаракатларига ўзи жавобгар”. Оқ уй вакили, шунингдек, Қўшма Штатлар Украинани қарши ҳужум учун зарур бўлган барча нарсалар билан таъминлашга эътибор қаратаётганини таъкидлади.
30 июлга ўтар кечаси ҳам Москвага учта дрон ҳужум қилганди. Уларнинг иккитаси “Москва Сити” бизнес марказидаги биноларга келиб тушган. Ундан аввалги дрон ҳужуми 24 июль куни бўлганди. Ўшанда Москвадаги нотурар жой бинолар зарар кўрган. Улардан бири Россия Мудофаа вазирлиги яқинида қулаган.
Изоҳ (0)