USAIDънинг Ўзбекистондаги миссиясига янги раҳбар тайинланди

Девид Хофман АҚШ Халқаро тараққиёт агентлигининг (USAID) Ўзбекистондаги миссиясини янги раҳбари этиб тайинланди. Бу ҳақда агентлик ўзининг Facebookъдаги саҳифаси орқали маълум қилди.

Қайд этилишича, миссиянинг янги директори Тошкентга етиб келган.

“Жаноб Хофман раҳбарлигида АҚШ Халқаро тараққиёт агентлиги Ўзбекистон ҳукумати томонидан амалга оширилаётган ислоҳотлар дастурини қўллаб-қувватлашда давом этади”, — дейилади хабарда.

Девид Хофман 4 август куни USAID ноиби Саманта Пауэр, шунингдек, Ўзбекистоннинг АҚШдаги элчиси Фурқат Сидиқов ҳамда АҚШнинг Ўзбекистондаги элчиси Жонатан Хеник (онлайн) гувоҳлигида Вашингтондаги USAID бош қароргоҳида лавозимга киришишдан олдин қасамёд қилган эди.

Девид Хофман USAID тизимида 2009 йилдан бери фаолият юритиб келади. У Калифорнияда туғилган, болалик йилларини Германияда ўтказган. Стенфорт университетида дастлаб халқаро муносабатлар бўйича, кейин эса физика бўйича бакалавр даражасини олган. Шунингдек, у Берклидаги Калиформия университетида сиёсий фанлар доктори (PhD) бўлган.

АҚШ Халқаро тараққиёт агентлигининг Ўзбекистондаги ваколатхонаси 2020 йилда очилган. Бунгача агентликнинг Ўзбекистондаги ваколатхонаси Марказий Осиёда (Олмаотада) USAID миссиясининг таркибига кирган. Миссиянинг биринчи директори Микаэла Мередит эди.