Mikaela Meredit 10-iyun kuni AQSh Xalqaro taraqqiyot agentligi (USAID)ning O‘zbekistondagi missiyasining birinchi direktori sifatida o‘z vazifasini boshladi. Bu haqda AQShning Toshkentdagi elchixonasi xabar berdi.
Mikaela Meredit USAID’da rivojlanish sohasida qariyb 30 yillik tajribaga ega. Ushbu lavozimga tayinlanishidan oldin 2018-yildan 2021-yilgacha USAID’ning Albaniyadagi vakili va 2015-yildan 2018-yilgacha Ozarbayjonda USAID missiyasining direktori lavozimlarida faoliyat yuritgan. Shuningdek, u Yaman, Nigeriya, Kongo Demokratik Respublikasi va Vashingtonda (AQSh) turli lavozimlarda ishlab kelgan. AQShning Nyu-Yorkdagi Kolumbiya Universiteti Xalqaro aloqalar maktabining magistr darajasiga ega.
“Biz bugun USAID’ning O‘zbekiston hukumati va xalqi bilan sherikligining yangi sahifasi boshlanayotganining guvohi bo‘lyapmiz. USAID’ning kengaytirilgan ishtiroki O‘zbekistonni faol xususiy sektor va fuqarolik jamiyatini barpo etish, iqlim o‘zgarishi, ta’lim va sog‘liqni saqlash tizimlarini modernizatsiya qilish va samarali boshqaruvni mustahkamlashda qo‘llab-quvvatlash bo‘yicha umumiy qobiliyatimizni oshiradi”, — degan Alan Melser, AQShning O‘zbekistondagi muvaqqat ishlari vakili.
“Yangi missiyaning tashkil etilishi AQShning 2020-yilda qabul qilingan va Bayden ma’muriyati tomonidan yaqinda qo‘llab-quvvatlangan Markaziy Osiyo strategiyasining bir qismi edi. Men uchun USAID missiyasining O‘zbekistondagi birinchi direktori bo‘lish katta sharafdir. Bu muhim vazifani men butun mas’uliyat bilan boshlayman”, — deb qo‘shimcha qilgan u.
USAID’ning O‘zbekistondagi ikki tomonlama missiyasi 2020-yil sentabr oyida tashkil etilgan. Yangi missiya AQSh hukumatining O‘zbekiston hukumati va xalqi oldidagi uzoq muddatli majburiyatini ta’kidlaydi.
O‘zbekistonda USAID iqtisodiy o‘sishni yaxshilash, savdo-sotiq va xususiy sektorni qo‘llab-quvvatlashga qaratilgan tashabbuslarni qo‘llab-quvvatlaydi. Boshqa ustuvor yo‘nalishlar qatoriga ta’lim, suv xo‘jaligi, sog‘liqni saqlash, qonun ustuvorligi va fuqarolarning odil sudlovdan foydalanish imkoniyatlari, shuningdek, qayta tiklanadigan energiya, xavfsiz migratsiya va odam savdosiga qarshi kurash masalalari kiradi.
USAID’ning O‘zbekiston bilan hamkorligi mamlakat mustaqillikka erishganidan ko‘p o‘tmay boshlandi. 1992-yildan AQSh USAID orqali O‘zbekistonning rivojlanishini qo‘llab-quvvatlovchi dasturlarga 500 million dollardan ko‘proq mablag‘ ajratdi.
Izoh (0)