АҚШнинг Ўзбекистондаги элчиси Жонатан Хеник ва USAID миссияси директори Микаэла Мередит 25 апрель куни Халқаро қишлоқ хўжалиги университети кампусига ташриф буюриб, экологик ғоялар бўйича талабалар танлови ғолибларини тақдирлади.
“Глобал даражада ўйла, маҳаллий даражада ҳаракат қил” мавзусидаги экологик ғоялар бўйича талабалар танлови 2023 йил март ойида USAID’нинг Агробизнесни ривожлантириш лойиҳаси томонидан ХҚХУ билан ҳамкорликда эълон қилинган. Танлов иқлим ва экологик саводхонлик, пластикдан воз кечиш, экологик тоза мода, глобал тозалаш каби мавзулар, дарахт экиш жараёнини қамраб олди.
Аслини олганда, 3 аъзодан иборат бўлган 12 та жамоа ХҚХУ ўқитувчиларининг кўмаги остида турли лойиҳаларни ишлаб чиқди. Финалга чиққан уч жамоа турли соврин ва совғалар, барча иштирокчилар эсдалик ташаккурномалар билан тақдирланди.
“Иқлим ўзгаришига мослашиш нуқтаи назаридан, қишлоқ хўжалиги ресурс энг кўп сарф қилинадиган тармоқ ҳисобланади. Келажак авлодларнинг озиқ-овқат маҳсулотларидан фойдаланиш имкониятлари барқарор бўлишини таъминлаш учун пухта билимга эга бўлиб, инновацион фикрлайдиган ёш мутахассисларга атроф-муҳитни ҳимоя қилишнинг илғор услубларини татбиқ этиш имкониятини тақдим этиш ниҳоятда муҳим. Бугун қишлоқ хўжалиги соҳасида турли таълим дастурларини таклиф қилаётган янги инновацион таълим муассасаси бўлмиш Халқаро қишлоқ хўжалиги университетига ташриф буюришдан бағоят мамнунман”, — деган АҚШ элчиси Жонатан Хеник.
“Иқлим ўзгаришига мослашиш USAID глобал фаолиятининг асосини ташкил этади. Бутун дунё бўйлаб биз ҳукуматлар билан ҳамкорлик қилиб, уларга маҳаллий ҳамжамиятлар билан биргаликда ўз миллий иқлим стратегияларини амалга ошириш ва чидамлилигини кучайтиришга ёрдам берамиз. Илм-фан вакиллари билан бўлган ҳамкорлигимиз эса билимларни мустаҳкамлаш ва инновацияларни қўллаб-қувватлашга қаратилган”, — деб қўшимча қилган USAID миссияси директори Микаэла Мередит.
У талабаларнинг билими нақадар пухта, новаторлик ғоялари эса илғор эканини таъкидлаб, улар тақдим этган кўплаб ғояларни нафақат Ўзбекистонда, балки бутун дунёда ҳам татбиқ этиш мумкинлигини қайд этган.
Ер куни-2023 га бағишланган тадбир якунида USAID қишлоқ хўжалиги вазири Азиз Воитов ҳамда ХҚХУ ректори Мунира Аминова билан дарахт экиш маросимида иштирок этди.
Изоҳ (0)