Ўзбекистонлик божхоначилар 55 килограммга яқин гиёҳвандлик воситалари ва сунъий наркотик моддаларнинг мамлакат ҳудудига яширинча олиб кирилишига чек қўйди. Бу ҳақда Давлат божхона қўмитаси матбуот хизмати хабар берди.

Маълум қилинишича, Тошкент вилояти божхона бошқармасининг “Ойбек” чегара божхона постида республика ҳудудига кириб келган қўшни давлат фуқароси бошқарувида енгил автотранспорт воситаси божхона кўригидан ўтказилган. Кўрик давомида унинг газ баллони ичига турли шаклдаги 49 дона ва бензин баки ичига 31 дона полиэтилен ўрамлар моҳирлик билан яширилгани аниқланган.

Ўрамлар очиб кўрилганда эса уларнинг ичидаги модда Марказий божхона лабораториясида ўтказилган экпертиза хулосасига биноан 52 килограмм 877 грамм оғирликдаги гашиш ҳамда 2 килограммдан зиёд героин гиёҳванлик воситаси, 1 дона елим идиш ичидаги модда эса 950 грамм синтетик гиёҳвандлик воситаси экани маълум бўлди.

Ҳозирда ҳолат юзасидан божхона органлари томонидан терговга қадар текширув ҳаракатлари олиб борилмоқда.

Гиёҳванд моддалар савдоси

Март ойи ўрталарида ДХХ Чегара қўшинлари ва Наманган вилояти бўйича бошқармаси ҳарбий хизматчилари томонидан олиб борилган тезкор-қидирув тадбирларида катта миқдордаги наркотик моддаларнинг ўзбек-қирғиз давлат чегарасидан ноқонуний ўтказилган ҳолати аниқланганди.

Шунингдек, Навоий вилоятида наркотик моддалар савдоси билан шуғулланувчи жиноий гуруҳ қўлга олингани, Тошкентда гиёҳванд моддалар савдоси билан шуғулланган талабалар ушлангани, Самарқанддаги тунги клубда 10 минг АҚШ доллари эвазига гиёҳванд модда сотишга уринганлар қўлга тушгани тўғрисида хабар берилганди.